काठमाडौं, ९ वैशाख । उदयपुरको मस्जिदमा रहेकाहरुमा कारोना संक्रमण देखिएपछि अहिले देशभरका मस्जिद र मदरसामा अनुगमन थालिएको छ । राष्ट्रिय मुस्लिम आयोगले समिति गठन गरेर स्थानीय प्रशासनसँगको सहकार्यमा अनुगमन थालेको हो। मंगलबार काठमाडौंमा रहेका ४ वटा मस्जिदहरुमा अनुगमन गरिएको छ।
काठमाडौं महानगरपालिकाका मेयर विद्यासुन्दर शाक्य,महानगरीय प्रहरी प्रमुख विश्वराज पोखरेलसहित मुस्लिम आयोगको टोलीले मंगलबार काठमाडौंका विभिन्न ठाउँहरुमा रहेका मस्जिद र मदरसामा अनुगमन गरेको हो।
मस्जिदमा अनुगमनपछि मेयर शाक्यले मस्जिदहरुमा जमातीहरु लुकेर बसेको आशंका जनमानसमा रहेकाले अनुगमन गरिएको बताउनुभयो । उहाँले अनुगमनका क्रममा कोहीपनि लुकेर बसेको नपाइएको बताउनुभयो ।
मुस्लिम आयोगका अध्यक्ष समिम मिँया अन्सारीले उदयपुरको घटनापछि जनमानसमा पर्न गएको भ्रम चिर्नका लागि मुस्लिम आयोगले सर्वपक्षिय बैठकमार्फत अनुगमन समिति गठन गरी अनुगमन थालिएको जानकारी दिनुभयो ।
गत शुक्रबार उदयपुरको एक मस्जिदमा बस्दै आएका १२ जना जमातीहरुमा कोरोना भाइरस संक्रमण फेला परेको थियो ।
