झापा, १३ चैत । कोरोना भाइरस सङ्क्रमण पुष्टि भएकी युवतीसंगै नेपाल आएका बाह्रदशी गाउँपालिका – १ निवासी एक व्यक्तिसहित पाँच जनालाई नै क्वारेन्टाइनमा राखिएको छ ।
कतार एयरवेजको ‘क्यूआर ६५२’विमानबाट गत चैत ४ गते फ्रान्सबाट कतार हुँदै नेपाल आएकी युवतीसंगै वाह्रदशी गाउँपालिका १ खयरवारीका एक युवा पनि नेपाल आएका थिए ।
सामाजिक सञ्जालमा ‘क्युआर ६५२’ उडानबाट कोरोनाभाइरस सङ्क्रमित युवतीसँगै आएका युवाबारे विवरण सार्वजनिक भएपछि बाह्रदशी गाउँपालिकाले उनलाई आजबाट क्वारेन्टाइनमा राखेको बाह्रदशी गाउँपालिका – ३ का अध्यक्ष वीरेन्द्रप्रसाद राजवंशीले जानकारी दिनुभयो ।
कतारबाट नै आएका अर्का एक व्यक्तिलाई पनि बाह्रदशी गाउँपालिकाले आजदेखि क्वारेन्टाइनमा राखेको छ ।
क्वारेन्टाइनमा राखिएका ती युवाहरुले आफूहरुको स्वास्थ्य अवस्था अहिलेसम्म ठीक भएको र परिवार लगायत अरुलाई नआत्तिन सुझाव दिएका छन् ।
यता झापाका प्रमुख जिल्ला अधिकारी उदयवहादुर रानाले उक्त विमानमा आएका भनिएका झापाका पाँचै जना स्वास्थ्य रहेको र उनीहरुलाई क्वारेन्टाइनमा राखिएको बताउनुभयो ।
