काठमाडौं, १७ फागुन । ग्रील तथा स्टील व्यवसायीहरुले तत्काल सामाजिक सुरक्षा कोषमा जान नसकिने बताएका छन् । सरकारले सामाजिक सुरक्षा कोषमा अनिवार्य जानैपर्ने नियम बनाएपनि तत्काल त्यो अवस्था नरहेको व्यवसायीहरुले बताएका हुन् । ग्रील तथा स्टील व्यवसायी महासंघका अध्यक्ष मोहन कटुवालले तत्काल सामाजिक सुरक्षा कोषमा जान सक्ने अवस्था नभएपनि ढिलो चाँडो जानैपर्ने बताउनुभयो ।
न्यूनतम पारिश्रमिक दिनुपर्ने अवस्थामा पनि समस्या भइरहेको बेला सामाजिक सुरक्षा कोषमा तत्काल जान नसकिने उहाँले बताउनुभएको हो । उहाँले न्यूनतम पारिश्रमिक नपाउने÷दिन नसकिएको समस्या सामाधानका लागि पहल भइरहेको बताउनुभयो ।
मजदूरहरुको न्युनतम ज्याला र तलब, सुरक्षाका दृष्टिकोणले आवश्यक पर्ने सामग्रीहरुको उचित व्यवस्थापन गर्न पनि उहाँले उद्योगिहरुलाई आग्रह गर्नुभयो ।
उहाँले संघभित्र देखिएका कमिकमजोरीहरु हटाएर अगाडी बढ्ने विश्वास पनि ब्यक्त गर्नुभएको छ । साथै व्यवसायीहरुलाई व्यवसायीक बन्न पनि उहाँले आग्रह गर्नुभयो । अवैधानिक व्यवसाय गरिरहेकाहरुलाई महासंघले कारवाही गर्ने चेतावनी दिँदै अध्यक्ष कटुवालले बजारमा समान मुल्यका आधारमा काम गर्न आग्रह गर्नुभयो ।
शनिबार ग्रील तथा स्टील व्यवसायी संघ काठमाडौंको कार्यालय भवन उद्घाटन गर्नुका साथै वार्षिक साधारण सभा गरिएको छ । शनिबार नै लुभु, टिकाथली, इमाडोल, चाङ्गथली, लामाटार एरिया समितिको वार्षिक साधारणसभा र बनभोज कार्यक्रम पनि सम्पन्न भएको छ ।
