एजेन्सी, २१ मंसिर । अफगानिस्तानको दक्षिणी प्रान्त कान्दाहार र हेलमण्डमा अफगान सेनाले गरेको हवाई कारबाहीमा परी कम्तीमा १५ जना लडाकू मारिएका छन् । तालिबानी लडाकू लुकेर बसेका इलाका लक्षित कान्दाहार प्रान्तको नेश जिल्लामा गरिएको हवाई कारबाहीमा ९ लडाकू मारिएका थिए भने हेलमण्ड प्रान्तका नहर ए साराज जिल्लामा भएको हवाई कारबाहीमा ६ तालिबान लडाकू मारिएका हुन् ।
उक्त प्रान्तहरुमा सक्रिय रहेका तालिबानी लडाकू समूहले यस कारबाहीको विषयमा कुनै टिप्पणी गरेका छैनन् । हेलमण्ड र कान्दाहार तालिबानी लडाकू समूहको बलियो प्रभाव रहेको प्रान्त मानिन्छ ।
सुरक्षाबलले पटक पटक लडाकू विरुद्ध गरेको कारबाहीको क्रममा सो प्रान्तका कैयौं भाग सरकारको नियन्त्रणमा आएको अफगान सुरक्षाबलको दाबी रहेको छ ।
