काठमाडौं, २७ कात्तिक । संस्कृति, पर्यटन तथा नागरिक उडड्यनमन्त्री योगेशकुमार भट्टराईले प्रस्तावित निजगढ अन्तर्राष्ट्रिय विमानस्थल निर्माण गर्नुको विकल्प नरहेको बताउनु भएको छ ।
मन्त्री भट्टराईले त्रिुभवन अन्तराष्ट्रिय विमानस्थलमा देखिएको चापलाई व्यवस्थापन गर्न पनि प्रस्तावित निजगढ अन्तराष्ट्रिय विमानस्थललाई छिट्टै निर्माण गर्ने दृष्टिकोणका साथ सरकारले काम गरिरहेको पनि स्पष्ट पार्नु भयो ।
संघीय संसदको उद्योग तथा वाणिज्य र श्रम तथा उपभोक्ता हित समितिको बुधबार सिंहदरबारमा बसेको बैठकमा बोल्दै उहाँले त्रिभुवन अन्तराष्ट्रिय विमानस्थलमा देखिएको हवाई उडानको चापलाई ध्यानमा राखेर प्रस्तावित सो विमानस्थलको कामलाई अघि बढाउन सबै राजनीतिक दलहरुको सहमति रहेको पनि बताउनु भयो । केही ठूला नेता र सांसदहरुले विरोध गरेपनि सो विमानस्थल बनाउनुको विकल्प नरहेको मन्त्री भट्टराईको भनाई छ ।
मन्त्री भट्टराईले मुलुकमा एउटा मात्रै अन्तराष्ट्रिय विमानस्थल रहेकाले यसको चापलाई लिएर नकारात्मक टिप्पणी गरिरहन नमिल्नेतर्फ पनि सांसदहरुको ध्यानाकर्षण गराउनु भयो ।
उहाँले मुलुकको भौगोलिक अवस्था जटिल रहेकाले विमानस्थलहरुको निर्माणको कामलाई सरकारले प्राथमिकता राख्ने गरेको पनि स्पष्ट पार्नु भयो । नेपालमा हाल ३४ वटा विमानस्थल चालू अवस्थामा रहेका छन ।
