काठमाडौं, १७ जेठ । पद उही। परीक्षा उही। हल उही। तर, प्रश्नपत्र फरक। यस्तो कहाँ हुन्छ ? अन्यत्र नभए पनि नेपाल रेडक्रसमा हुँदो रहेछ। रेडक्रसले परीक्षा लिएर छैटौं तह लेखा अधिकृत नियुक्ति गरेको एक वर्ष हुन लाग्यो। आफ्ना मान्छे पास गराउन त्यो परीक्षामा भएको बेइमानी भने बल्ल खुलेको छ। त्यसमा उही हलमा बसेका परीक्षार्थीलाई फरक प्रश्नपत्र दिइएको पाइएको छ।
एउटा २० अंकको बाहेक अरू प्रश्न भने दुवैमा मिल्छन्। द्वितीय पत्रको नेपाली खण्डको १ नम्बरमा एउटा प्रश्नपत्रमा आन्तरिक लेखा परीक्षणबारे प्रश्न छ। अर्कोमा अन्तर्राष्ट्रिय व्यापारबारे।
प्रश्न फरक बन्नुको प्रकरण भने गम्भीर छ। छैटौं तहको लेखा र प्रशासनको परीक्षा उही दिन उही समय (२०७५ असार २ गते बिहान ८ बजेदेखि) भएको थियो। प्रशासनको एक प्रतिस्पर्धीलाई लेखा समूहको, त्यो पनि फरक प्रश्न दिइयो। उनको परीक्षा बिग्रियो। उनलाई षड्यन्त्रपूर्वक असफल गराएर सफल बनाइयो तत्कालीन अध्यक्ष सञ्जीव थापाकी भतिजी प्रतीक्षा थापालाई। उनी सञ्जीवका कान्छा भाइ राजीवकी छोरी हुन्। राजीव उदयपुरमा रेडक्रस उपशाखाका सभापति छन्। ती परीक्षार्थीलाई प्रशासनकै प्रश्न परेको भए थापाले सम्भवतः पास गर्ने थिइनन्।
यसबारे रेडक्रस केन्द्रीय पदपूर्ति समितिका तत्कालीन सभापति सुरेन्द्र ऐरले फरकफरक प्रश्नपत्रको प्रकरण स्वीकारे। ‘अन्तिम घडीमा प्रश्नपत्रको एउटा प्रश्न स्तर नमिल्ने ठानियो। त्यसलाई फेरियो। पुरानो प्रश्नपत्र पनि थाकमै छुटेछ र प्रशासन समूहको एक परीक्षार्थीलाई परेछ’, उनले भने, ‘उनको परीक्षा कमसल भयो। उनले रेडक्रसमा उजुरी पनि दिएका छन्।’ तर, न उनको सुनुवाइ भयो। न परीक्षा रद्ध गरियो। यति ठूलो बदासीलाई प्राविधिक त्रुटिका नाममा अलमल्याउँदै आइएको छ।
उता लेखातर्फ छैटौं तहमा उत्तीर्ण अविनास तामाङ रसुवा सभापति बाबुलाल तामाङका भतिज हुन्। ‘दोहोरो प्रश्नपत्रको एउटै तीरले केन्द्रीय अध्यक्ष र जिल्ला सभापतिका भतिजी÷भजितालाई पास गराइयो’, रेडक्रसका एक उच्च अधिकारीले भने, ‘आफ्नालाई सजिलो, अरूलाई जटिल प्रश्न दिइयो। फसाइयो।’
परोपकारी संस्था रेडक्रसमा अनियमितता अनियन्त्रित भएपछि थापा नेतृत्वको समितिलाई हालै सरकारले विघटन गरेको छ। एक वर्षभित्र चुनाव गराउने गरी डा. विश्वकेशर मास्केको अध्यक्षतामा तदर्थ समिति बनाएको छ। त्यसको उपाध्यक्षमा कृष्ण गौतम, महामन्त्री कमल निरौला, कोषाध्यक्ष सीताराम कोइराला, सदस्यमा दीपेन्द्र ढकाल, दीपक मि श्र, लोकराज ढकाललगायत छन्।
रेडक्रसका सात आधारभूत सिद्धान्त छन्– मानवता, निष्पक्षता, तटस्थता, स्वाधीनता, एकता, विश्वव्यापकता र ऐच्छिक सेवा। यिनै सिद्धान्तलाई आत्मसात् गर्दै रेडक्रस विश्वव्यापी रूपमा परोपकारमा सक्रिय छ। नेपालमा भने ती सबै सिद्धान्त मिच्ने गरिन्छ। यो समाचार आजको अन्नपुर्ण पोष्ट् दैनिकमा लेखेको छ ।
