काठमाडौं, २६ चैत । ओलम्पिक खेलकुदको महिला फुटबल अन्तर्गत एसिया क्षेत्र छनोटको दोस्रो चरणको अन्तिम खेलमा नेपालले इन्डोनेसियालाई २–१ गोल अन्तरले पराजित गरेको छ । म्यानमारको बहतु रंगशालामा मंगलवार भएको खेलमा नेपालले इण्डोनेसियालाई २–१ गोल अन्तरले पराजित गरेको हो ।
सन् २०२० मा हुने टोकियो ओलम्पिक छनोटको दोस्रो चरणको अन्तिम खेलमा नेपालले सान्त्वना जित निकालेको हो । नेपालको जितका सावित्रा भण्डारीले दुई गोल गरिन् । उनले खेलको ३६ औं र ८९ औं मिनेटमा गोल गरिन् ।
यता इन्डोनेसियाले ४७ औं मिनेटमा एक गोल गरेको थियो । जितसँगै नेपालले प्रतियोगितामा सुखद अन्त्य गरेको छ । छनोटको अन्तिम खेलमा इन्डोनेसियालाई पराजित गरेपनि नेपाल तेस्रो चरणमा पुग्न सकेन । नेपाल पहिलो खेलमा म्यानमारसँग तीन एक र भारतसँग पनि तीन एक गोल अन्तरले पराजित भएको थियो ।
