काठमाडौं, २३ मंसिर । ऐतिहासिक–सामाजिक–सांस्कृतिक सदभाव कायम गर्न आह्वान गर्दै आइतवार काठमाडौं–जनकपुर साईकल यात्रा सुरु गरिएको छ ।
हिन्दुहरुको पवित्र तीर्थस्थल काठमाडौंको पशुपतिनाथबाट ऐतिहासिक–सामाजिक–सांस्कृतिक सद्भाव कायम गर्न आह्वान गर्दै सो साईकल यात्रा शुभारम्भ गरिएको हो ।
आईतबार पशुपतिनाथ परिसरमा एक कार्यक्रमका बीच उपप्रधानमन्त्री एवम् रक्षामन्त्री ईश्वर पोखरेलले साईकल यात्राको शुभारम्भ गरेका छन् । साइकल यात्रामा ८५ जना सहभागी रहेका छन । सो साईकल यात्रा वीर पूर्खाहरुले तत्कालीन अंग्रेज फौजलाइ हराएको ऐतिहासिक स्थल सिन्धुलीगढी हुँदै धार्मिक नगरी जनकपुरस्थित रामजानकी मन्दिरमा पुगेर समापन हुनेछ ।
जनकपुरमा विवाह पञ्चमीको अवसर पारेर सो साईकल यात्रा आयोजना गरिएको हो । कार्यक्रममा उपप्रधानमन्त्री पोखरेलले साईकल यात्राले पर्यटकीय क्षेत्रको मात्रै नभएर मुलुकको राजनीतिक, आर्थिक तथा देशभक्तिको भाव जागृत गर्न महत्वपूर्ण भूमिका निर्वाह गर्ने विश्वास व्यक्त गरे ।
सो साईकल यात्रा ४ दिनमा २ सय २५ किलोमिटर पार गरी जनकपुरस्थित जानकी मन्दिरमा पुगेर समापन हुनेछ ।
