काठमाडौं, ३० कात्तिक । प्रहरी महानिरीक्षक सर्वेन्द्र खनालले नेपाल प्रहरीले विगतमा गरिएका गल्ती नदोहो-याउने प्रतिवद्धता व्यक्त गरेका छन् । प्रहरी महानिरीक्षक खनालले राष्ट्र र नागरिकको सेवामा मन, बचन र कर्मले समर्पित हुने प्रण समेत गरेका छन् ।
‘नागरिक–प्रहरी जनचेतनामूलक गीत’ को शुक्रबार काठमाडौंमा एक कार्यक्रमकाबीच लोकार्पण गर्दै उनले इमान्दारिताका साथ देश र नागरिकको सेवामा लागि रहन नागरिक समाजका अगुवाहरुले नेपाल प्रहरीलाई उत्साहित बनाउने काम गरिरहेको बताए ।
गायक विजयनारायण मानन्धरको स्वरमा सजिएको सो गितको रचना रमेशचन्द्र अधिकारीले गरेका हुन भने संगीत भूपेन्द्र रायमाझीको रहेको छ ।
प्रहरी महानिरीक्षक खनालले सो गितले समाजमा शान्ति सुरक्षा कायम गर्न र अपराध नियन्त्रणका लागि प्रहरीहरुलाई झनै उत्साहका साथ काम गर्न प्रेरित गर्ने विश्वास पनि व्यक्त गरे ।
त्यस अवसरमा बोल्दै उनले अपराध नियन्त्रणका लागि नेपाल प्रहरीलाई आवश्यक साथ दिन पनि नागरिक समाजसँग पुनः आह्वान गरेका छन् ।
