मोरङ, २९ भदौ । गाउँ गाउँमा स्वास्थ्य केन्द्र भएपनि डाक्टर नभएको गुनासो बारम्बार आईरहन्छ । हुँदा हुँदै अञ्चल अस्पताल विराटनगरको अवस्था पनि त्यस्तै देखिएको छ ।
विराटनगरमा रहेको कोशी अञ्चल अस्पतालले सेवा प्रभाव चुस्त दुरुस्त बनाउनु त परै जावस् रातीको समयमा डाक्टरसमेत भेट्न मुस्किल पर्न थालेको छ । अस्पतालमा रातीको समयमा ४ जना कर्मचारीको दरवन्दी रहेको छ । तर, राती ११ बजेपछि इमरजेन्सी सेवामा कुनै डाक्टर भेटिदैनन् ।
अञ्चल अस्पताल अहिले रातीको समयमा अनमी, हेल्परको भरमा चलिरहेको छ । यस अस्पतालको गुनासो वारम्वार आएपछि माउन्टेन प्रदेश १ टिभिका संञ्चारकर्मीहरु गत वुधवार रातभरी कोशी अञ्चल अस्पतालमा समाचार संकलनमा जुटेका थिए । तर, त्यो दिन कोहीपनि डाक्टर रातीको समयमा आएनन् ।
स्वास्थ्य जस्तो संवेदनशिल क्षेत्रमा विराटनगर स्थित अञ्चल अस्पतालले वारम्वार लापरवाही गर्दै आईरहेको छ । यस विषयमा प्रतिक्रिया लिन खोज्दा अस्पतालका प्रमुख मेडिकल सुपरिटेन्ड रोसान पोखरेलले कुनै प्रतिक्रिया दिन मानेनन् ।