एजेन्सी, ७ साउन । इरानका राष्ट्रपति हसन रुहानीले अमेरिकी राष्ट्रपति डोनल्ड ट्रम्पलाई इरानविरोधी नीतिलाई लिएर कडा चेतावनी दिएका छन् । रुहानीले बाघको पुच्छरमा समाएर नखेल्न ट्रम्पलाई चेतावनी दिए ।
अमेरिकाले शत्रुतापूर्ण नीति लिएको भन्दै इरानी राष्ट्रपति हसन रुहानीले अमेरिकी राष्ट्रपति डोनल्ड ट्रम्पलाई धम्की दिएका हुन् । रुहानीले आफूलाई नजिस्काउन भन्दै ट्रम्पलाई धम्की दिएका हुन् रुहानीले भने, ‘मिस्टर ट्रम्प, तपाईं बाघको पुच्छरमा समाएर नखेल्नुस्, किनकि यसबाट पछुताउने बाहेक अरु केही विकल्प बाँकी रहँदैन ।’
इरानी अखबार तेहरान टाइम्सका अनुसार इरानी कुटनीतिज्ञहरुलाई सम्बोधन गर्दै रुहानीले कसैले इरानलाई धम्काए आफूलाई सह्य नहुने बताए । इरानलाई अमेरिकी राष्ट्रपति ट्रम्पले ट्वीटरमार्फत जवाफ दिएका छन् ।
अमेरिकालाई दोस्रो पटक धम्की नदिन ट्रम्पले रुहानीलाई सचेत गराए । पुनः त्यस्तै खालको धम्कि इरानबाट आए त्यसको परिणाम नराम्रो हुने भन्दै ट्रम्पले पनि इतिहासमै कहिल्यै नभुल्ने खालको स्थिति आउन सक्ने धम्की दिए ।
थोरैमात्र राजनीति बुझ्नेले इरानको तेल निर्यात रोक्नेबारे बोल्न पनि नसक्ने भन्दै रुहानीले इरान समुद्री मार्गमा शान्तिको ध्वजावाहक भएको दाबी गरे ।
