काठमाडौं, ३० असार । रुसमा जारी विश्वकप फुटबलअन्तर्गत आज तेस्रो स्थानका लागि खेल हुँदै छ । तेस्रो स्थानका लागि आज इङ्ल्याण्ड र बेल्जियम आमने सामने हुँदैछन् ।
खेल नेपाली समय अनुसार बेलुका ७ः४५ बजे हुने छ । सेमिफाइनल खेलमा इङ्ल्याण्ड क्रोएसियासँग तथा बेल्जियम फ्रान्ससँग पराजित भएका थिए । जारी विश्वकपमा इङ्ल्याण्ड र बेल्जियमबीच समुह चरणमा भेट भएको थियो ।
समुह चरणको खेलमा बेल्जियमले इङ्ल्याण्डलाई १–० गोलअन्तरले पराजित गरेको थियो । पहिलोपटक विश्वकप उचाल्ने योजनाका साथ रुस पुगेको बेल्जियम उपाधि होडबाट वाहिरिए पनि उत्कृष्ट लयमा छ ।
उता इङ्ल्याण्ड तेस्रो स्थान हासिल गरी उपाधि होडबाट बाहिरिनुपरेको पीडा भुलाउने योजनामा छ । इङ्ल्याण्डले बेल्जियमसँगको खेललाई समूह चरणमा व्यहोरेको हारको बदला लिने अवसरको रुपमा लिएको छ ।
बेल्जियम र इङ्ल्याण्डबीच विश्वकपमा तीन पटक भिडन्त भएकोमा दुबै टोलीले एक एक खेलमा जित हात पारेको इतिहास छ ।
