काठमाडौं, १९ चैत । इंग्लिस प्रिमियर लिग फुटबलमा टोटनह्याम हट्स्परसँग ३–१ ले पराजित भएसँगै चेल्सीको अर्को वर्षको च्याम्पियन्स लिगमा छनौंट हुने सम्भावना कमजोर भएको छ ।
घरेलु मैदानमा चेल्सी टोटनह्यामसँग ३–१ गोलले पराजित भयो । अर्को सिजनको च्याम्पियन्स लिगमा स्थान बनाउनका लागि महत्वपूर्ण रहेको खेलमा चेल्सीले एक गोलको अग्रता जोगाउन सकेन । ३० औं मिनेटमा अल्भारो मोराटाले गोल गर्दै चेल्सीलाई अग्रता दिलाएका थिए । पहिलो हाफको इन्ज्युरी समयमा क्रिष्टियन इरिक्सनले २५ यार्ड टाढाबाट उत्कृष्ट गोल गर्दै टोटनह्यामलाई खेलमा फर्काए ।
६२ औं र ६६ औं मिनेटमा डेले आलीले गोल गर्दै जित दिलाए । जितसँगै टोटनह्यामले अर्को सिजनको च्याम्पियन्स लिगको दाबेदारीता बलियो बनाएको छ भने चेल्सीको सम्भावना न्यून बनेको छ । यो नतिजाले चेल्सी टोटनह्याम भन्दा ८ अंकले पछि रहेको छ । प्रिमियर लिगमा सात खेल बाँकी रहेको अवस्थामा टोटनह्यामसँगको दुरी कम गराउन चेल्सीलाई ठूलो चुनौती हुनेछ ।
तालिकामा टोटनह्यामले ६४ अंक बनाएको छ भने चेल्सीको ५६ अंक छ ।
