काठमाडौं, १६ चैत । नेकपा एमालेका नेता एवम पूर्व प्रधानमन्त्री माधवकुमार नेपालले भ्रष्टाचार नियन्त्रणका लागि ठोस कदम चाल्न प्रधानमन्त्री केपी शर्मा ओलीलाई सुझाव दिएका छन् ।
एमाले नेता नेपालले शुक्रबार काठमाडौंमा आयोजित एक कार्यक्रममा प्रधानमन्त्री र मन्त्रीहरुका भाषणले भ्रष्टाचार नियन्त्रण नहुने भन्दै भ्रष्टाचार नियन्त्रणका लागि सरकारले कडा कदम चाल्नुपर्ने बताए । उनले प्रधानमन्त्री र मन्त्रीहरुलाई भ्रष्टाचार नगर्ने प्रतिबद्धतासहित भ्रष्टाचारमा संलग्नमाथि एक एक गरेर कारवाही थाल्न सुझाव दिए । उनले राज्यका सबैजसो निकायमा भ्रष्टाचार व्याप्त रहेकाले आम जनताले प्रधानमन्त्री र मन्त्रीहरुबाट भाषणभन्दा काम चाहेको बताए ।
एमाले नेता नेपालले भ्रष्टाचार मौलाएकै कारण विकास निर्माणका काममा राज्यको लगानी बालुवामा पानी हालेजस्तो भएको बताए । कार्यक्रममा भौतिक पूर्वाधार तथा यातायातमन्त्री रघुबीर महासेठले विकास निर्माणका कामको गुणस्तरमा सरकारले सम्झौता नगर्ने बताए । उनले गुणस्तरमा लापर्बाही गर्ने ठेकेदार र कर्मचारीमाथि कार्बाही गर्ने प्रतिबद्धता जनाए ।
भौतिक पूर्वाधार तथा यातायातमन्त्री महासेठले सार्वजनिक यातायातको क्षेत्रमा दादागिरी देखाएर सिन्डिकेट खडा गर्न खोज्ने व्यावसायीलाई कार्बाहीको दायरामा ल्याउने प्रतिबद्धता पनि जनाए ।
