काठमाडौं, १५ चैत । पहिलोपटक संघीय संसदका दुबै सदनलाई संयुक्त सम्बोधन गरेकी राष्ट्रपति विद्यादेवी भण्डारीले अभिभावकभन्दा पनि कार्यकारीको भाषा प्रयोग गरेको प्रतिपक्षी दल कांग्रेसले प्रतिक्रिया दिएको छ । राष्ट्रपतिको सम्बोधन लगत्तै प्रतिक्रिया दिँदै कांग्रेस नेताहरुले राष्ट्रपतिले सरकारको भाषा प्रयोग गरेको टिप्पणी गरेका हुन् ।
राष्ट्रपति भण्डारीले दुबै सदनलाई १५ मिनेट लिखित रुपमा सम्बोधन गरेकी छन् । घोडसवार सैन्य स्कर्टिङमा शितल निवासबाट संघीय संसद भवन पुगेकी भण्डारीले सेनाको सलामी सम्मान लिएर संघीय संसदमा सम्बोधन गरेकी थिइन् ।
भ्रष्टाचार, दमन र उत्पीडन अन्त्य गर्दै समुन्नत समाज निर्माणको अभियानमा लाग्न उनले सबैलाई आह्वान गरिन् ।
सम्बोधनमा राष्ट्रपति भण्डारीले तीन तहको निर्वाचनले संविधान कार्यान्वयन गरेको र समृद्ध नेपाल निर्माण गर्ने ढोका खुलेको बताइन् । अब समृद्ध नेपाल निर्माणको अभियान पनि सार्थक हुनेमा उनले विश्वास व्यक्त गरिन् ।
भण्डारीले सम्बोधन गर्दै गर्दा संसदको अडियो विभागको कमजोरीका कारण साउन्ड सिस्टम नै बन्द हुँदा भने खल्लो बनाएको थियो । राष्ट्रपतिको सम्बोधनपछि प्रतिक्रिया दिँदै संसदको प्रमुख प्रतिपक्षी दल नेपाली कांग्रेसले राष्ट्र प्रमुखबाट आउनुपर्ने धेरै कुरा छुटेको बताएको छ ।
राष्ट्रपतिको सम्बोधन सरकारले तयार पारेर संसदमै हस्तान्तरण गर्दा सरकारका कार्यक्रमहरु त्यसमा परे पनि राष्ट्रप्रमुखबाट आउन सक्ने धेरै विषय छुटेको कांग्रेस नेता बालकृष्ण खाँडको भनाइ छ ।
राष्ट्रपतिको सम्बोधनलाई संसदमा पुगेका विभिन्न क्षेत्रमा व्यक्तित्वहरुले प्रत्यक्षरुपमा आउनुपर्ने विषय केही छुटेपनि समृद्धिका लागि सार्वजनिक आह्वान भएकाले सकारात्मक रुपमा लिनुपर्ने बताए ।
गणतन्त्र नेपालको राष्ट्रप्रमुखले आम नागरिकमा समेत उत्साह जगाउनका लागि संघीय संसदको पहिलो अधिवेशनमा राष्ट्रपतिले सम्बोधन गर्ने संवैधानिक व्यवस्था राखिएको हो ।
राष्ट्रपतिले आम नागरिकलाई सम्बोधन गर्ने भाषा सरकारले संसदमा एक्कासी दिँदा त्यसमा पूर्णरुपमा सरकारकै ‘भर्सन’ जानु अस्वभाविक पनि होइन । तर, गणतन्त्र नेपालको पहिलो अभ्यासलाई सकारात्मक रुपमा लिँदै छुटेका भाषालाई भन्दा समेटिएका सकारात्मक विषयमा सन्तुष्टि जनाउनु बेश हुने जानकाहरु बताउँछन् ।
