काठमाडौं, ३ चैत । आईसीसी एकदिवसीय विश्वकप छनोटअन्तर्गत सातौं स्थानका लागि भएको खेलमा नेदरल्याण्डले नेपालसामु १ सय ९० रनको लक्ष्य प्रस्तुत गरेको छ ।
क्वेक्वेस्थित मैदानमा टस जितेर ब्याटिङमा उत्रिएको नेरदल्याण्डले निर्धारित ५० ओभरमा ९ विकेट गुमाएर १ सय ८९ रन बनायो । नेदरल्याण्डका लागि बास दे लिदेले सर्वाधिक ३९ रन बनाए । त्यस्तै, म्याक्स डाउडले २८ रन बनाउँदा रियोलफ भेनडर र स्कट इडवार्डले समान २५–२५ रन बनाए । पिटर सीलार र साने सनेटरले २३–२३ रन बनाए ।
नेपालका लागि सोमपाल कामीले ४ विकेट लिए । त्यस्तै सन्दीप लामिछाने र ललित राजवंशीले २–२ विकेट लिँदा शक्ति गौचनले १ विकेट लिए । अहिले नेपाल जवाफी ब्याटीङ गर्दै छ ।
लिस्ट ए प्रतियोगितामा ५० विकेट पूरा गर्ने पहिलो नेपाली खेलाडी बनेका सोमपालले आजको खेलमा ४ विकेट लिएसँगै ५४ विकेट लिएकाे रेकर्ड बनाए ।
