आगामी आर्थिक वर्षको पहिलो चौमासिकमै दुई अंकको आर्थिक वृद्धिदर हासिल गर्ने प्रधानमन्त्री ओलीको दाबी
काठमाडौं, १७ फागुन । प्रधानमन्त्री केपी शर्मा ओलीले आगामी आर्थिक वर्षको कात्तिक मसान्तसम्ममा देशमा दोहोरो अंकको आर्थिक वृद्धिदर हासिल गर्ने दाबी गरेका छन् ।
बिहीबार बालुवाटारमा नेपाल चेम्बर अफ कमर्शको सुझाब प्रतिवेदन बुझ्दै ओलीले निजी क्षेत्रसँंग सहकार्य गरी आउँंदो आर्थिक वर्षको प्रथम चौमासिकमै दुई अंकको आर्थिक बृद्धि हासिल गर्ने दाबी गरेका हुन् ।
गत आर्थिक वर्षमा भएको ७ दशमलव ९ प्रतिशतको आर्थिक बृद्धिदरलाई बढाएर दुई अंकको आर्थिक बृद्धिद्धरमा पु¥याउने योजना रहेको प्रधानमन्त्रीको भनाइ छ ।
चेम्वरका अध्यक्ष राजेशकाजी श्रेष्ठले मुलुकको आर्थिक बृद्धिका लागि सरकारलाई सुझाव प्रतिवेदन बुझाएका थिए । स्थानीय, प्रदेश र केन्द्र सरकारबाट लगाइराखेको दोहोरो कर प्रणालीबारे उनले प्रधानमन्त्रीको ध्यानाकर्षण गराएका थिए।
कार्यक्रममा अर्थमन्त्री डा. युवराज खतिवडाले चेम्बरले दिएको सुझाबमध्ये तत्काल गर्न सकिने कामहरु तत्काल अघि बढाउने प्रतिबद्धता जनाए । खतिवडाले सरकारले पूँजी प्रवाहलाई उच्च प्राथमिकता दिने प्रतिबद्धता जाहेर गरे ।
चेम्वरले ‘आगामी दशक दोहोरो अंकको आर्थिक बृद्धिको दशक’ हुनुपर्नेमा जोड दिएको छ । बिहीबार प्रधानमन्त्री ओली र अर्थमन्त्री खतिवडासमक्ष निजी क्षेत्रको तर्फबाट मुलुकको समस्त आर्थिक विकासका लागि बुझाइएको २३ पृष्ठ लामो सुझाब प्रतिवेदन सरकार र निजी क्षेत्र त्यसका लागि संयुक्त रुपमा मिलेर अघि बढ्नुपर्नेमा जोड दिइएको छ ।
कार्यक्रममा चेम्वरका निवर्तमान अध्यक्ष सुरेश बस्नेत, वरिष्ठ उपाध्यक्ष राजेन्द्र मल्ल, उपाध्यक्षहरु कमलेश कुमार अग्रवाल, महेन्द्रमान श्रेष्ठ, दीपक कुमार मलहोत्रा, इच्छाराज तामाङ, भाष्करराज राजकर्णिकारलगायतका पदाधिकारी तथा कार्यसमितिका सदस्यहरु सहभागी थिए ।
