रियादस्थित किङ खालिद विमानस्थलमा हुथी विद्रोहीको आक्रमणः १२ जनाको मृत्यु, ३०९ घाइते

साउदी अरबको राजधानी रियादस्थित किङ खालिद अन्तर्राष्ट्रिय विमानस्थललाई लक्षित गरी यमनको हुथी विद्रोही समूहले गरेको भीषण आक्रमणमा परी १२ जनाको मृत्यु भएको छ भने ३०९ जना घाइते भएका छन् । शनिवार दिउँसो भएको उक्त आक्रमणपछि विमानस्थलका नियमित उडानहरू अस्थायी रूपमा बन्द गरिएका छन् भने घाइतेहरूको स्थानीय अस्पतालहरूमा उपचार भइरहेको छ । साउदी अरबको नागरिक उड्डयन प्राधिकरण (गाका) ले आईतवार बिहान जारी गरेको विज्ञप्तिअनुसार ज्यान गुमाउनेहरूमा चार जना साउदी नागरिक र आठ जना विदेशी नागरिक रहेका छन् । विदेशी मृतकहरूमा दुई जना बंगलादेशी तथा संयुक्त राज्य अमेरिका, इजिप्ट, जोर्डन, सिरिया, प्यालेस्टाइन र सुडानका एक–एक जना नागरिक रहेका छन् । घाइतेमध्ये केहीको अवस्था गम्भीर रहेकाले मृतकको संख्या बढ्न सक्ने चिकित्सकहरूलाई उद्धृत गर्दै जनाइएको छ । आक्रमणका कारण विमानस्थलको भौतिक संरचनामा भएको क्षतिको मूल्यांकन र सुरक्षा परीक्षण पूरा नभएसम्मका लागि सबै उडान सेवाहरू स्थगित गरिएको प्राधिकरणले स्पष्ट पारेको छ । उक्त आक्रमणलगत्तै हुथी समूहले विज्ञप्ति जारी गर्दै विमानस्थल, बन्दरगाह र मानवीय सेवा प्रवाह हुने संवेदनशील पूर्वाधारहरूलाई सैन्य द्वन्द्वबाट बाहिर राख्न आफूहरू साउदी अरेबियासँग पारस्परिक सम्झौताका लागि तयार रहेको दाबी गरेको छ । यता, रियाद आक्रमणको जवाफमा साउदी अरेबियाले हुथी नियन्त्रित यमनको राजधानी सानास्थित अन्तर्राष्ट्रिय विमानस्थल, रणनीतिक महत्त्वको बाब अल–मन्दाब जलडमरूमध्य क्षेत्र र उत्तरी प्रान्तहरूमा तीव्र हवाई तथा क्षेप्यास्त्र आक्रमण गरेको छ । हुथीद्वारा सञ्चालित अल–मसिराह टेलिभिजनले साउदी गठबन्धनले व्यापक स्तरमा बमबारी गरेको जनाएको छ । यसैबीच, यमनको सरकारी सेनाले पछिल्लो २४ घण्टामा भएका १ हजार ९ सयभन्दा बढी प्रहारहरूमा १ हजार १५० भन्दा बढी हुथी लडाकुहरू मारिएको र १८० भन्दा बढी सैन्य तथा बन्दोबस्तीका सवारी साधन नष्ट गरिएको दाबी गरेको छ । यद्यपि, स्वतन्त्र स्रोतहरूबाट यी तथ्यांकहरूको पुष्टि हुन सकेको छैन।्ल्लयमनको दक्षिण–पश्चिमी शहर ताइज वरपर हुथी विद्रोहीहरूको तिब्र अग्रसरताले सरकारी सुरक्षा निकायमाथि थप दबाब सिर्जना गरेको छ । सन् २०१४ को अन्त्यतिर हुथीहरूले राजधानी साना कब्जा गरेपछि शुरु भएको यमन द्वन्द्वमा सन् २०१५ मा साउदी नेतृत्वको गठबन्धनले हस्तक्षेप गरेको थियो । सन् २०२२ मा संयुक्त राष्ट्रसंघको मध्यस्थतामा भएको युद्धविरामपछि ठूला सैन्य गतिविधि रोकिए पनि पछिल्लो आक्रमण–प्रत्याक्रमणले मध्यपूर्वमा पुनः गम्भीर संकट निम्त्याएको छ ।