ज्वालामुखी विस्फोटका कारण इण्डोनेसियामा चार विमानस्थलको उडान निलम्बन अवधि थप

इण्डोनेसियाको अनाक क्राकाटाउ ज्वालामुखी पुनः विस्फोट भई खरानी उडेपछि अधिकारीहरूले चारवटा विमानस्थलको उडान निलम्बन अवधि थप गरेका छन् । विमानस्थल सञ्चालक संस्था अङ्कासा पूरा इण्डोनेसियाकाअनुसार जाकार्तास्थित सोकार्नो–हट्टा र हालिम पेरडानाकुसुमा, लाम्पुङको राडिन इन्टेन २ तथा बान्डुङको हुसेन सास्त्रनेगरा विमानस्थलमा उडान सेवा स्थगित गरिएको छ । मौसम विज्ञान, जलवायु तथा भूभौतिकी निकायकाअनुसार सोमबार बिहानको भू–उपग्रह तस्बिरमा ज्वालामुखीको खरानीका दुईवटा झुप्पा अझै पनि जाकार्तातर्फ बहिरहेको देखिएको छ । अनाक क्राकाटाउको पछिल्लो सक्रियताका कारण गत सप्ताहान्तमा १,५०० भन्दा बढी उडानहरू अवरुद्ध भएका थिए, जसबाट करिब १ लाख ७० हजार यात्रु प्रभावित भएको बताइएको छ । जाभा र सुमात्रा टापुको बीचमा रहेको सुन्डा जलसन्धिमा अवस्थित यो ज्वालामुखी पछिल्ला वर्षहरूमा बारम्बार विस्फोट हुँदै आएको छ । सन् २०१८ मा यसको एक भाग समुद्रमा खस्दा आएको विनाशकारी सुनामीमा परी ४०० भन्दा बढी मानिसको मृत्यु भएको थियो ।