सरकारको निरङ्कुशताविरुद्ध सडकमा उत्रिन विद्यार्थी संगठनहरुलाई एमाले सांसद बरालको आह्वान

काठमाडौँ । नेकपा (एमाले)की सांसद यशोदाकुमारी बरालले सरकारको निरङ्कुशताविरुद्ध सडकमा उत्रिन विद्यार्थी संगठनहरुलाई आह्वान गर्नुभएको छ ।
प्रतिनिधि सभाको सोमवारको बैठकमा बोल्दै उहाँले यस्तो आह्वान गर्नुभएको हो । उहाँले अपांगता भएका नागरिक र सुत्केरी महिला समेत खाना पकाउने ग्यासका लागि दिनभर लाइनमा बस्नुपर्ने अवस्था रहेको भन्दै सरकारको आलोचना गर्नुभयो । उहाँले ग्यास अभावको कारण नागरिकले सास्ती व्यहोर्नुपरेको भएपनि सरकार नागरिकको समस्याप्रति संवेदनशील नभएको आरोप पनि लगाउनु भयो । उहाँले सरकारमा अलिकति पनि मानवता छैन ? भन्दै प्रश्न समेत गर्नुभयो ।
उहाँले भन्नुभयो, ‘अपांगता भएको नागरिक समेत एक ग्यासको लागि दिनभरी लाइनमा बस्नु परेको छ । सरकारमा मानवता छैन ।  १३ दिनको सुत्केरीले १४ दिनपछि ग्यास पाए भनेर समाचारमा आउँछ । कति दिनसम्म जनतालाई रुवाउने सरकार ? के जनताले नेपालमा बाँच्न नै नपाउने हो ? म विद्यार्थी संगठनलाई आग्रह गर्न चाहान्छु, निरङ्कुश सरकारको विरुद्धमा उठ्नुस् म छु तपाईहरुको साथमा । विद्यार्थी संगठनले खबरदारी नगरेकै कारण सरकारको निरङ्कुशता बढ्यो ।’
उहाँले सरकारमाथि खबरदारी नपुगेको कारण सरकारको निरङ्कुशता बढ्दै गएको आरोप पनि लगाउनु भयो ।