स्पेन युरो २०२४ को फाइनलमा पुगेको छ ।
जर्मनीको म्युनिखमा भएको पहिलो सेमिफाइनलमा फ्रान्स माथि २–१ गोल अन्तरको पुनरागमन जित दर्ता गर्दै स्पेनले १२ वर्ष पछि युरोको फाइनलमा स्थान सुरक्षित गरेको हो ।
नवौं मिनेटमा नै फ्रान्सले लिएको अग्रता भंग गर्दै स्पेन उपाधि नजिक पुगेको हो । किलियन एमबाप्पेको क्रसमा रान्डाल कोलो मुआनीले हेडर गोल गर्दै फ्रान्सलाई अग्रता दिलाए ।
२१औं मिनेटमा स्पेनले बराबरी गोल गर्यो । १६ वर्षीय लामिन यमालले बक्स बाहिरबाट गरेको उत्कृष्ट प्रहार गोल भएको हो ।
त्यसको चार मिनेटपछि नै २५औं मिनेटमा स्पेनले अग्रता लियो । जिसस नाभासको क्रस क्लियर भएपछि बक्स भित्र नै ड्यानी ओल्मोले विजयी गोल गरेका हुन् । तीन पल्टको च्याम्पियन स्पेन युरो इतिहासमै लगातार ६ खेल जित्ने पहिलो टिम बनेको छ र अब चौथो उपाधिबाट एकै खेल मात्र टाढा छ ।
स्पेनले आज हुने इङ्ल्यान्ड र नेदरल्याण्ड्स बीचको दोस्रो सेमिफाइनलको विजेतासँग फाइनल खेल्नेछ ।
स्पेन २०१२ पछि पहिलो युरो उपाधिको खोजीमा छ । २०१२ को फाइनलमा इटालीलाई ४–० गोलअन्तरले पराजित गर्दै लगातार दोस्रो पटक उपाधि जितेको स्पेन फेरी युरो च्याम्पियन बन्ने प्रयासमा छ । ०००
