सरकारले आजदेखि देशभरका बालबालिकालाई पोलियोविरुद्धको खोप अभियान सञ्चालन गर्ने भएको छ ।
दुई हप्तासम्म चल्ने अभियानमार्फत पोलियोविरुद्धको खोप ‘आईपीभी’ दिइनेछ । यसअघि खोप लगाउन छुटेका बालबालिकाले अभियानमा खोप लगाउन पाउने स्वास्थ्य सेवा विभागले जनाएको छ ।
पोलियो रोगको सङ्क्रमण अझैपनि देखिएकाले अभियान सञ्चालन गर्न लागिएको हो । बालबालिकालाई पोलियोबाट बचाउन देशभरका करिब १४ लाख ६२ हजार बालबालिकालाई ‘आईपीभी’ लगाइनेछ ।
विभागका अनुसार २०७३ वैशाखदेखि २०७५ असोजसम्म जन्मिएका बालबालिकालाई खोप लगाईने छ । सन् २०१६ देखि २०१८ को बीचमा ‘आइपीभी’ खोप उत्पादन हुन नसकेपछि ती उमेर समूहका बालबालिका खोप लगाउनबाट छुटेका थिए ।
खोप अभियानका लागि ग्लोबल एलाएन्स फर भ्याक्सिन एण्ड इमुनाइजेसनले ३२ करोड बराबरको खोप उपलब्ध गराएको विभागले जनाएको छ ।
नियमिततर्फ पोलियोविरुद्ध ६ हप्ता, १० हप्ता र १४ हप्ताका बालबालिकालाई मुखबाट थोपा खुवाईने तथा १४ हप्तादेखि नौ महिनासम्मका बालबालिकालाई खोप लगाउने गरिएको छ । सरकारले सन् २०२६ सम्म पोलियो उन्मूलन गर्ने लक्ष्य राखेको छ । ०००
