संसद्को बजेट अधिवेशन नजिकिँदै गर्दा सभामुख देवराज घिमिरेले प्रधानमन्त्रीसहित शीर्ष नेताहरूसँग आज छलफल गर्दै हुनुहुन्छ ।
छलफल बिहान सिंहदरबारस्थित सभामुखको कार्यकक्षमा साढे ११ बजेका लागि राखिएको सभामुखको सचिवालयले जनाएको छ ।
यही वैशाख २८ गते संसद् अधिवेशन शुरु हुन लागेको र कांग्रेसका अवरोध जारी रहने संकेतलाई मध्यनजर गरी सभामुख घिमिरेले बैठक बोलाउनु भएको हो ।
बैठकमा प्रधानमन्त्री पुष्पकमल दाहाल ‘प्रचण्ड’, नेपाली कांग्रेस सभापति शेरबहादुर देउवा, नेकपा एमालेका अध्यक्ष केपी शर्मा ओली, राष्ट्रिय स्वतन्त्र पार्टीका सभापति रवि लामिछाने र राष्ट्रिय प्रजातन्त्र पार्टीका अध्यक्ष राजेन्द्र लिङदेनलाई डाकिएको छ ।
सहकारीको रकम हिनामिना प्रकरणमा रास्वपाका सभापति समेत रहेका गृहमन्त्री लामिछानेको संलग्नताबारे छानबिन गर्न संसदीय समितिको माग गर्दै कांग्रेसले बैठक अवरुद्ध गरिरहेकै बेला अधिवेशन अन्त्य गरिएको थियो । कांग्रेसले आरोध जारी राख्ने संकेत दिएपछि बजेट अधिवेशनको कारबाही पनि प्रभावित हुने आशंकामा सभामुखले शीर्ष नेताहरूको बैठक बोलाउनु भएको हो । ०००
