काठमाडौं । इंग्लिस क्लब आर्सनलका प्रशिक्षक आर्सेन वेङ्गर अबको दुई सिजन पनि क्लबमै रहने भएका छन् ।
विगत २१ वर्षदेखि आर्सनलमा रहँदै आएका वेङ्गरको क्लबसँगको सम्झौता सकिँदै थियो । तर आर्सनल र वेङ्गरबिच नयाँ सम्झौताको तयारी भएको छ ।
जसमा वेङ्गर अबको दुई वर्ष क्लबमै रहने छन् । यसको औपचारिक घोषणा आर्सनलले बुधबार गरिसकेको छ । वेङ्गर र क्लबका मालिक स्टान क्रोएनकेबिच सोमाबार भेटवार्ता भएको थियो ।
त्यसपछि मंगलबारको सञ्चालक समितिको बैठकले वेङ्गरसँग दुई वर्षको नयाँ सम्झौता गर्ने निर्णय गरेको हो । आर्सनल यो सिजन प्रिमियर लिगमा पाँचौं स्थानमा रह्यो ।
सन् १९९६ मा वेङ्गर क्लब आएदेखि आर्सनल शीर्ष चार भन्दा बाहिर रहेको यो पहिलो पटक हो । तर आर्सनलले यो वर्षको एफए कपको उपाधि भने जित्यो ।
