काठमाडौं,२३ पुस । सामुदायिक विद्यालय व्यवस्थापन समिति महासंघले शिक्षणको भाषा सम्बन्धित विद्यालयको निर्णय बमोजिम गरिनुपर्ने बताएको छ । आईतवार प्रतिनिधि सभा अन्तर्गतको शिक्षा, स्वास्थ्य तथा सूचना प्रविधि समितिको बैठकमा महासंघका प्रतिनिधिहरुले विद्यालय शिक्षा विधेयकको संशोधनको सम्बन्धमा धारणा राख्दै यस्तो बताएका हुन् । उनीहरुले प्रश्तावित विद्यालय शिक्षा विधेयकमा गणित, विज्ञान र कम्युटर अंग्रेजी भाषामा पढाउनुपर्ने उल्लेख गरिएको भन्दै सबै विद्यालयमा यो प्रावधान लागू गर्नु नहुने बताएका छन् । बैठकमा बोल्दै सामुदायिक विद्यालय व्यवस्थापन समिति महासंघका अध्यक्ष गुणराज मोक्तानले विद्यालयमा कुन भाषामा शिक्षण गराउने भन्नेकुरा अभिभावकहरुसँगको सल्लाहमा विद्यालयले टुंग्याउनुपर्ने बताउनु भयो । उहाँले भाषाका कारण गणित र विज्ञानमा विद्यार्थीहरुको सिकाइ कमजोर बन्ने अवस्था आउन दिनु नहुने बताउनु भयो ।
उहाँले भाषाको विषय विद्यालय स्वयंले निर्णय गर्न पाउने व्यवस्था गर्नुपर्ने बताउनु भयो । त्यस्तै सरकारको अनुदानले पूर्ण रुपमा विद्यालय सञ्चालन गर्न नपुगेको अवस्थामा अभिभावकहरुसँग आर्थिक साझेदारी गर्न सकिने व्यवस्था गर्नुपर्ने पनि बताउनु भयो । विद्यालयको प्रधानाध्यापक गाउँपालिकाले नियुक्ती गर्नसक्ने व्यवस्था गर्नुपर्ने र नियुक्ति कार्यपालिकाले नगरी सोझै प्रमुख प्रशासकिय अधिकृतले गर्नसक्ने व्यवस्था गर्नुपर्ने बताउनु भयो । कार्यपालिकाले प्रअ नियुक्ति गर्दा राजनीतिक हस्तक्षेप हुने उहाँको भनाई छ ।
उहाँले विद्यालय व्यवस्थापन समितिको अध्यक्ष अभिभावकहरु मध्येबाटै तोकिनुपर्ने बताउनु भयो । सामुदायिक विद्यालयहरुलाई सार्वजनिक विद्यालय नभनी सामुदायिक विद्यालय नै भनेर नामाकरण गर्नुपर्ने उहाँको भनाई छ । यस्तो नाम राखिएमा समुदायले अपनत्व महशुस गर्ने उहाँले बताउनु भयो । उहाँले विद्यालय व्यवस्थापन समितिसँगको परामर्शमा मात्रै शिक्षक सरुवा हुने व्यवस्था गर्नुपर्ने बताउनु भयो । उहाँले ऐनमा विद्यालय व्यवस्थापन महासंघको पनि व्यवस्था हुनुपर्ने माग गर्नुभयो ।
