काठमाडौं,९ पुस । काभ्रेमा नाबालिकालाई बलात्कार गरेको आरोपमा एक विद्यालयका प्रधानध्यापकसहित २ शिक्षकलाई प्रहरीले पक्राउ गरेको छ । पाँचखाल नगरपालिका–६ स्थित जोरपाटी माध्यमिक विद्यालयका प्रधानध्यापक गणेशमान गुरुङ र विज्ञान शिक्षक मच्छेनारायण श्रेष्ठ पक्राउ परेका हुन् । श्रेष्ठले विज्ञान विषय पढाउँदै आएका थिए ।
कक्षा ९ मा पढ्ने एक छात्रामाथि बलात्कार गरेको आरोपमा उनीहरुलाई पक्राउ गरिएको प्रहरीले जनाएको छ । पीडित बालिकाको सामाजिक सञ्जालमार्फत उनका साथीहरुले घटनाबारे जानकारी पाएका थिए । साथीहरुले नै आइतबार नगरपालिकालाई खबर गरेका हुन् ।
आइतबार नै विद्यालय पुगेका जनप्रतिनिधिहरुले घटनाबारे बुझेर प्रधानध्यापक र विज्ञान शिक्षकलाई प्रहरीको जिम्मा लगाएको बुझिएको छ । विज्ञान शिक्षक श्रेष्ठले छात्रालाई दशैं तिहारको बीचको बिदामा फकाएर बनेपा लगेर बलात्कार गरेको खुलासा भएको छ ।
विद्यालयका प्रधानध्यापकसहित अन्य शिक्षकहरुले ति बालिकालाई सामाजिक सञ्जालमार्फत अश्लील र आपत्तिजनक मेसेज पठाउने गरेको देखिएको समेत स्थानीय जनप्रतिनिधिहरुले बताएको स्रोतले जनाएको छ ।