काठमाडौं, १८ मंसिर । प्रधानमन्त्री पुष्पकमल दाहालले मन्त्रीमण्डल पुनःगठनको सम्भावना नरहेको बताउनुभएको छ । आईतवार युएई भ्रमण सकेर स्वदेश फर्किएसँगै विमानस्थलमा आयोजित पत्रकार सम्मेलनमा उहाँले यस्तो बताउनुभएको हो । उहाँले मन्त्रीमण्डल पुनःगठनबारे गठबन्धनभित्र छलफल नै नभएको स्पष्ट पार्नुभयो । उहाँले मन्त्रीमण्डल पुनःगठन बाहिर हल्ला फिजाउनका लागि मात्रै भएको बताउनु भयो ।
उहाँले भन्नुभयो, ‘सरकार गठन भएको बेलादेखि नै मन्त्रीमण्डल पुनःगठन हुन्छ । को मन्त्री हट्छ, को आउँछ, गृहमन्त्री हट्ने भन्नेकुरा धेरै भयो । तर अहिले कुनै त्यस्तो हामीले गठबन्धन भित्र छलफल पनि छैन, कुरा पनि छैन, सोचिएको पनि छैन, म आफैँ प्रधानमन्त्री छु, मेरो दिमागमै छैन । त्यसकारण यो कुरा हल्लामात्रै हो, सत्यता छैन ।’
प्रधानमन्त्री दाहालले दुबई भ्रमणका क्रममा दुबई जानबाट वञ्चित भएका ३१ जना यात्रुहरु छुटेकोप्रति दुःख व्यक्त गर्नुभयो । उहाँले आफूलाई दुई घण्टा अघि सार्दा सो यात्रुहरु छुट्छन् भन्ने जानकारी भए तोकिएको समयमै आफू जाने बताउनु भयो ।
उहाँले भन्नुभयो, ‘यदी मलाई दुई २ घण्टा अघि सारिँदैछ र त्यसो गर्दा ३१ जना यात्रु छुट्दैछन् भन्ने थाहा भएको भए म दुई घण्टा छिटो जाँदिन थिएँ, जुन समय हो त्यही समयमा जान्थेँ । उहाँ पुगेपछि मेरो कारणले दुई घण्टा छिटो ल्याउन खोज्दा छुटेको भन्ने थाहा पाएँ ।’ प्रधानमन्त्री दाहालले समग्रमा कोप २८ मा नेपालको तर्फबाट महत्वपूर्ण प्रश्ताव र कुरा राखेको बताउनु भयो ।
