काठमाडौं, १८ जेठ । बुधबार भारत पुगेका प्रधानमन्त्री पुष्पकमल दाहाल र भारतीय प्रधानमन्त्री नरेन्द्र मोदीबीच भेटवार्ता हुने भएको छ । भेटमा ऊर्जा, कनेक्टिभिटी र व्यापारलगायतका क्षेत्रमा भारत–नेपाल सहयोग अभिवृद्धिमा जोड दिने वार्ता हुने जनाइएको छ ।
प्रचण्ड चार दिने भारत भ्रमणमा छन् । सन् २०२२ को डिसेम्बरमा प्रधानमन्त्री बनेपछि प्रचण्डको यो पहिलो द्विपक्षीय विदेश भ्रमण हो । समग्र रणनीतिक हितका दृष्टिले नेपाल भारतका लागि महत्वपूर्ण छ । दुवै देशका नेताहरूले बारम्बार पुरानो रोटी–बेटी सम्बन्धलाई जोड दिइरहेका छन्।
दुवै देशको प्राथमिकतामा पर्ने एउटा महत्वपूर्ण क्षेत्र भनेको ऊर्जा क्षेत्रमा सहकार्यलाई थप अभिवृद्धि गर्ने बताइएको छ । विद्युत् क्षेत्रमा सहकार्य सम्बन्धी गत वर्ष अप्रिलमा भारत–नेपाल संयुक्त वक्तव्य कोसेढुङ्गा मानिएको छ र नेपालले भारतमा करिब ४५० मेगावाट विद्युत् निर्यात गर्दै आएको छ ।
दुवै प्रधानमन्त्रीले द्विपक्षीय सम्बन्धको महत्वपूर्ण स्तम्भ भारत–नेपाल विकास साझेदारीको समीक्षा गर्ने अपेक्षा गरिएको छ। दुई देशको आर्थिक सम्पर्कलाई सुदृढ बनाउने विषयमा पनि छलफल हुनेछ । प्रचण्डलाई दिल्लीको विमानस्थलमा विदेश राज्यमन्त्री मीनाक्षी लेखीले स्वागत गरेकी थिइन् ।
यसैबीच प्रचण्डले राष्ट्रपति द्रौपदी मुर्मु र उपराष्ट्रपति जगदीप धनखरसँग पनि भेट गर्ने कार्यक्रम छ । यसअघि बुधबार नेपाला प्रचण्डले राष्ट्रिय सुरक्षा सल्लाहकार (एनएसए) अजित डोभालसँग भेटवार्ता गरेका थिए । प्रचण्ड शुक्रबार बिहान इन्दौर जाने र भोलिपल्ट स्वदेश फर्कनेछन् ।
