काठमाडौं, १६ चैत्र । भोलिदेखि यस वर्षको माध्यमिक शिक्षा परीक्षा (एसईई)को परीक्षा सुरु हुँदैछ । राष्ट्रिय परीक्षा बोर्डले परीक्षका लागि आवश्यक सम्पुर्ण तयारी पुरा गरेको जनाएको छ ।
यस वर्षको एसईईको परीक्षामा ५ लाख १६ हनजार ५९१ परीक्षार्थी सहभागी हुँदैछन् । बोर्डको अनुसार २ लाख ६० हजार ६७४ छात्र र २ लाख ५५ हजार ९१७ छात्राले एसईई परीक्षा दिँदैछन् । परीक्षाका लागि आवश्यक उत्तरपुस्तिका सबै परीक्षा केन्द्रमा र प्रश्नपत्र सुरक्षा केन्द्रहरुमा पठाइसकिएको छ ।
यस वर्ष विदेशबाट पनि परीक्षार्थीहरु परीक्षमा सहभागी हुनेछन् । बोर्डको अनुसार वैदेशिक रोजगारीमा रहेका नेपालीका छोराछोरीहरु ४० जनाले जापानबाटै परीक्षा दिन लागेका हुन् । बालबालिकाहरुले जापान सरकारको अनुमति लिएर नेपाली पाठ्यक्रम पढिरहेका छन् ।
७७ जिल्लामा २ हजार ३६ परीक्षा केन्द्र निर्धारण गरिएको छ भने सबैभन्दा बढी परीक्षा केन्द्र बागमती प्रदेशमा छन् । बागमती प्रदेशका १ लाख ६ हजार ९५९ परीक्षार्थीका लागि ४३४ परीक्षा केन्द्र तोकिएको छ ।
