काठमाडौं, ११ चैत्र । स्वतन्त्र विद्यार्थी समूह बलियो देखेपछि नेपाल कमर्श क्याम्पस मिनभवनको चुनाव रोक्ने चलखेल भएको छ । आज हुने भनिएको चुनाव मतदान अधिकृत नै गायब गरेर रोक्न खोजिएको छ ।
मतदान अधिकृत तुल्सी रेग्मी शुक्रवारबाट नै सम्पर्कविहिन भएका छन् । उनलाई प्रमुख विद्यार्थी संगठनहरुले नै सम्पर्कमा नआउन भनेको बुझिएको छ ।
मिनभवन क्याम्पसमा स्वतन्त्र विद्यार्थी समूह बलियो बन्दै गएको छ । चुनावमा मुख्य राजनीतिक दल निकट विद्यार्थी संगठनहरु कठिन अवस्थामा देखिएका छन् । यसका कारण कहिले चुनाव सार्ने त कहिले मतदान अधिकृत नै गायब हुने अवस्था बनाइएको छ ।
स्वतन्त्र विद्यार्थी समूहबाट सभापतिका उम्मेदवार कृष्ण हुमागाईंले देशभर स्ववियू चुनावमा धेरै ठाउँमा धाँधली भएको नेपाल कमर्श क्याम्पसको घटनाले पुष्टि गरेको बताए । उनले स्वतन्त्र समूहले जित्ने डरले राजनीतिक दलका भातृ संगठन आत्तिएको बताए ।
कुनै हालतमा चुनाव हुनुपर्नेमा हुमागाईंको जोड छ । चुनाव रोकेमा कडा कदम चाल्ने चेतवानी दिएका छन् ।
स्वतन्त्र विद्यार्थी समूहले त्रिभुवन विश्वविद्यालयको स्ववियू चुनावमै दुई सिट जितेको छ । यसबाहेक देशका विभिन्न क्याम्पसहरुमा उसले विभिन्न पदहरुमा जित निकालेको छ ।
