काठमाडौं । प्रधानमन्त्री पुष्पकमल दाहालले आज चिनियाँ कम्युनिष्ट पार्टीका विदेश विभागका सदस्य एवं उच्च नेताहरुसँग भेटवार्ता गर्ने कार्यक्रम रहेको छ ।
शनिबार साँझ बोआओबाट चीनको राजधानी बेइजिङ पुग्नुभएका प्रधानमन्त्र िदाहाल आज र भोलि उच्चस्तरीय भेटवार्तामा व्यस्त हुनुहुनेछ । सोमबार उहाँले चिनियाँ राष्ट्रपति सि जिन पिङसँग भेटवार्ता गर्नुहुने कार्यक्रम रहेको छ ।
साताव्यापी चीन भ्रमणमा रहनुभएका प्रधानमन्त्रीलाई बेइजिङमा चिनियाँ कम्युनिष्ट पार्टीका विदेश विभागका सदस्य एवम् नेपाली राजदूतावासका कर्मचारी, नेपाली व्यवसायी एवम् विद्यार्थीले बेइजिङ विमानस्थलमा स्वागत गरेका थिए ।
प्रधानमन्त्रीलाई बेइजिङस्थित दियाओयुताई स्टेट गेस्टहाउसमा बस्ने व्यवस्था मिलाइएको छ । विमानस्थलदेखि गेस्ट हाउससम्म पुग्ने सडकको एक खण्ड पूरै खाली गराएर प्रधानमन्त्रीको स्कर्टिङ गरिएको प्रधानमन्त्री दाहालका स्वकीय सचिव प्रकाश दाहालले जानकारी दिनुभयो ।
सोमबार बेइजिङस्थित राष्ट्रपति कार्यालयको ग्रेट हल आफ दि पिपुल्समा चिनियाँ राष्ट्रपतिसँग भेटवार्ता हुने छ । भेट वार्तामा प्रधानमन्त्री दाहालले नेपालको आर्थिक विकासमा सहायताका लागि आग्रह गर्नुहुने छ ।
उहाँले केरुङदेखि काठमाडौं हुँदै पोखरा–लुम्बिीनी रेल मार्गलाई अघि बढाउन प्रस्ताव समेत गर्नुहुने छ ।
यस अघिको केपी शर्मा ओली नेतृत्वको सरकारका पालामा भएका सम्झौताहरुलाई कार्यन्वयनका लागि चीनले जोड दिदै आएको छ । दुई नेता बीचको भेटवार्तामा कुनै सम्झौता भने हुने छैन ।
