काठमाडौं । नेकपा (एकीकृत समाजवादी)का नेता मेटमणी चौधरीले नेकपा (एमाले) अध्यक्ष केपी शर्मा ओली नसुध्रिएसम्म एमालेसहितको वाम एकताको सम्भावना नरहेको रहेको बताउनु भएको छ।
केपी शर्मा ओलीलाई संसारकै गफाडी र कमजोर चेतना भएको व्यक्तिको संज्ञा दिदैं पूर्वमन्त्री चौधरीले ओलीले विगतमा गरेका कमजोरी महसुस गरी माफी नमागेसम्म एमालेसँग सहकार्य नहुने स्पष्ट पार्नुभएको हो ।
नेता चौधरीले माउण्टेन टेलिभिजनबाट प्रसारण भएको ‘माउण्टेन संवाद’ कार्यक्रममा पत्रकार खगेन्द्र विष्टसँग कुरा गर्दै वाम एकताको लक्ष्य र परियोजन बारे स्पष्ट खाका बनाउनुपर्नेमा जोड दिनुभयो । ‘हाम्रो पार्टी वाम एकताको पक्षमा भए पनि वाम एकता कुन लक्ष्य र कुन परियोजन लागि भन्ने खाका प्रष्ट हुनुपर्छ ।’–उहाँले भन्नुभयो ।
तत्कालिन नेकपा टिक्न नसक्नुको कारण, कसको कहाँ गल्ति भयो भन्नेमा समिक्षा नगरी वाम एकताका लागि अघि बढ्ने कुरा सान्दर्भिक नहुने उहाँको भनाई छ ।
सरकारमा जाने सन्दर्भमा नेता चौधरीले आफ्नो पार्टीलाई सम्मानजनक प्रस्ताव आयो भने वर्तमान सरकारमा सहभागी हुन सक्ने बताउनुभयो ।
