काठमाडौं । नेपाली कांग्रेसको बिहान ८ बजेदेखि सुरु हुने भनिएको संसदीय दलको नेता चयन गर्न करिब एक घण्टापछि मतदान सुरु भएको छ ।
सिंहदरबारस्थित दलको कार्यालयमा मतदान सुरु भएको हो । केही सांसदहरुले भोट हाल्ने स्थानसम्म मोबाइल लैजान पाउनुपर्ने माग गरेपछि मतदान ढिलाई भइरहेको थियो ।
१० बजेसम्म मतदान समय तोकिएको छ । सांसदहरू दलको कार्यालय परिसरमा सांसद पदमा निर्वाचित भएको प्रमाणपत्र जाँच गरेर भित्र पस्न दिइएको थियो ।
गत मंसिर ४ गते सम्पन्न भएको निर्वाचनमा निर्वाचित कांग्रेसका ८९ जना सांसदले निर्वाचन प्रक्रियामा भाग लिनेछन् ।
सभापति प्रधानमन्त्री शेरबहादुर देउवा र महामन्त्री गगन थापाले संसदीय दलको नेताका लागि मंगलबार उम्मेदवारी दर्ता गरेका छन् ।
