काठमाडौं । प्रधानमन्त्री पुष्पकमल दाहाल राजनीतिमा पनि सफाई अभियान चाल्नुपर्ने बेला आइसकेको बताउनुभएको छ ।
शनिबार राजधानीको शंखमुलमा बागमती नदी सरसफाई अभियानको दुई सयौं हप्ता पुगेको उपलक्ष्यमा आयोजित पदयात्रा कार्यक्रममा प्धानमन्त्री दाहालले राजनीतिमा पनि सुद्धिकरण आवश्यक रहेको बताउनुभयो । उहाँले संविधान संशोधन र स्थानीय तहको निर्वाचन पश्चात् राजनीतिमा पनि ठोस परिवर्तन देखिने बताउनुभयो ।
प्रधानमन्त्री दाहालले नेपालको सभ्यतासँग जोडीएका नदीनालाको संरक्षण र सफाइका लागि सरकारले आवश्यक सहयोग गर्ने प्रतिवद्वता जनाउनुभयो । उहाँले राजधानी काठमाडौंसँग जोडीएको बागमती सभ्यतालाई जीवन्त राख्नका लागि आम जनताले देखाएको चासोबाट आफु पनि उत्साहित भएको बताउनुभयो । उहाँले बागमती संरक्षणका लागि कार्ययोजना सहित अघि बढ्न पनि सरोकारवाला निकायलाई निर्देशन दिनुभयो ।
कार्यक्रममा पुर्व मुख्य सचिव एवं बागमती सफाई अभियानका अभियन्ता लिलामणी पोखरेलले अबको केही वषर्् भित्रै बागमतीले पुरानै स्वरुप लिने बताउनुभयो । १५ वटा मुख्य र ३ वटा सहायक स्थानमा एकसाथ कार्यक्रम सुरु गरिएको सफाई अभियान र पदयात्रामाा १ लाखभन्दा बढीको उपस्थिति रहेको आयोजकले दाबी गरेको छ । यसअघि सरकारले २८ चैत्र २०७१ मा १०० औं हप्ता पुगेको अबसरमा सुन्दरीजलदेखि चोभारसम्म करिब २८ किलोमिटर लामो मानव साङग्लो बनाइएको थियो ।
