काठमाडौं, २९ मंसिर । कानुन व्यवसायीहरुको छाता संगठन नेपाल बार एशोसिएसनले राष्ट्रपति विद्या भण्डारीलाई राष्ट्रिय सभाको निर्वाचनसम्बन्धि अध्यादेश रोक्ने अधिकार नभएको दावी गरेको छ ।
नेपाल बार एशोसिएशनका अध्यक्ष शेरबहादुर केसीले राष्ट्रिय सभाको निर्वाचन नभई मुलुकमा नयाँ सरकार गठन गर्ने संवैधानिक व्यवस्था नभएको प्रतिक्रिया दिए ।
शुक्रबार काठमाडौंमा आयोजित साक्षात्कार कार्यक्रममा बोल्दै उनले संवैधानिक व्यवस्था अनुसार संघीय संसदमा ३३ प्रतिशत महिला प्रतिनिधित्व गराउनुपर्ने भएकाले पनि राष्ट्रिय सभाको गठन नभई संसदले पूर्णता नपाउने र संसद नबनी सरकार गठन गर्ने कुरा हुनै नसक्ने तर्क गरे ।
अध्यक्ष केसीले संविधानको भावना विपरित अघि बढ्न राजनीतिक दलहरुलाई आफूहरुले नदिने उनले चेतावनी दिए । कार्यक्रममा बोल्दै संविधानविद् डा. चन्द्रकान्त ज्ञवालीले पनि संघीय संसदले पूर्णता पाएपछि मात्रै नयाँ सरकार गठन प्रक्रिया अघि बढ्ने संवैधानिक व्यवस्था रहेको स्पष्ट पारे । उनले सरकार संसदले बनाउनुपर्ने भएकाले संसदलाई पूर्णता दिने काम पहिलो काम भएको बताए ।
यता, निर्वाचन आयोगले पनि संवैधानिक व्यवस्था अनुसार राष्ट्रिय सभाको निर्वाचन सम्पन्न नभई समानुपातिकतर्फ विजयी उम्मेदवारहरु घोषणा गर्न नसक्ने जनाउ दिएको छ ।
