बागलुङ । बागलुङ जिल्लाको पश्चिम रिघा गाविस–७ मनेवापाटामा पहिरो खसेर दरमखोला थुनिदा मध्यपहाडि लोकमार्ग अन्तरगत बागलुङ–बुर्तिवाङ सडक खण्ड अबरुद्ध भएको छ ।
पुष्पलाल मध्यपहाडी लोकमार्ग माथिबाट आइतबार बिहान खसेको पहिरोका कारण बिहान ५ बजेदेखि खोला थुनिएको स्थानीय बासिन्दाले बताएका छन् । खोला थुनिएपछि त्यहाँ ठूलो ताल बन्दै गएको छ ।
स्थानीय मनकुमारी शाही सहित अन्य केहीको घर डुबानको खतरामा छ । अहिले शाहीको परिवार घर छोडेर सुरक्षित स्थान तर्फ लागेको स्थानीय डम्बर श्रीसले बताउनुभयो । मध्यपहाडी लोकमार्गको बागलुङ–बुर्तिबाङ सडकखण्ड पूर्ण रुपमा अवरुद्ध छ ।
सडक अवरुद्ध भएपछि बुर्तिबाङबाट छुटेका गाडी खरबाङमा रोकिएका छन् भने काठमाडौं तथा बागलुङबाट गएका गाडीहरु हटियामा रोकिएका छन् ।
प्रहरीले जुनसुकै बेला पहिरोले थुनिएर बनेको ताल फुट्न सक्ने भन्दै सुरक्षा सजगता अपनाउन तटिय क्षेत्रका बासिन्दालाई आग्रह गरेको छ । खोला थुनिएको स्थान बागलुङ सदरमुकामबाट पश्चिम तर्फ १८ कोष टाढा पर्छ ।
