महोत्तरी । सिकारीले थापेको पासोमा परेर दुर्घटनामा परिएला भनेर बर्दिबास-१ का ५५ वर्षीय पूर्णबहादुर बलाम्पाकीले कहिल्यै सोचेका पनि थिएनन् । तर, २९ वैशाख बिहान उनले नसाेचेकै घटना भयाे । घाँस काट्न बिहानैअटावे खोल्सीतिर निस्केका बलाम्पामाथि खोल्सीतिर लम्किएकाे केही क्षणमामै दुई राउण्ड गोली लाग्याे । उनकाे तिघ्रामा गाेलीकाे गहिराे चाेट लागेकाे छ । दुवै तिघ्रामा गोली लागेपछि उनी खोल्सीमै ढले, अत्याधिक रगत बगेकाले उठ्नै सकेनन् । निकैबेर घर नफर्किएपछि परिवारले खोजी गर्दा उनलाई अर्ध बेहाेस अवस्थामा फेला पार्याे ।
`बुबाकाे दुवै खुट्टामा गोली लागेछ । भाईलाई फोन गर्नुभयाे । हामी त्यहाँ पुग्दा रगत निक्कै बगेको रहेछ । त्यहाँबाट उठाएर बल्लतल्ल अस्पताल पुर्यायौँ।´ बलाम्पाकी की कान्छी छोरी निरु बलाम्पाकीले भनिन् । घाँस काट्न जाने क्रममा सिकारीले थापेको पासोमा रहेको धागोमा टेक्दा गोली लागेकाे प्रहरीको पारम्भिक अनुसन्धानले पनि पुष्टि गरेकाे छ ।
बलाम्पाकी परिवारका एक्लो भरोसा हुन् । परिवारका पाँच जना उनकै भरोसामा छ । कृषि कर्मबाट पारिवार भरणपोषण गर्दै आएका बलाम्पाकी अहिले उपचारका लागि बिएण्डबी अस्पताल काठमाण्डौंमा उपचाररत छन् । उपचारमा केही खर्च नवनिर्वाचित नगरप्रमुख प्रल्हाद क्षेत्रीले सहयोग गरेको पीडित परिवारको भनाइ छ ।
पीडित बलाम्पाकीको बयानअनुसार मकरलाल कटुवालले पासो थापेका हुन् । बन्दुक पड्किएको आवाज सुनेपछि कटवाल सिकार पर्यो कि भनेर हेर्न आएको र मान्छे पासोमा परेको देखेपछि घटनास्थलबाट फरार भएको पीडितकाे भनाइ छ । पीडित परिवारले अहिलेसम्म मकरबहादुरविरुद्ध उजुरी भने दिएकाे छैन । सुरुमा बर्दिबास-१४ बस्ने मकरलालले नै पासाे थापेकाे पीडित परिवारले दाबी गरेको पनि अहिले नचिनेको बताउँदै आएकाे छ ।
`अहिले सबैले निवेदन नदिनु भनेका छन् । ३५ दिनभित्र निवेदन दिने सल्लाह भएकोले त्यतिकै बसेको छौँ ।’ पीडित बलाम्पाकीका दाजु मानबहादुर बलाम्पाकीले भने । पैसाको बलमा दोषीलाई बचाउन खोज्नु गलत भएको स्थानीय बताउँछन् । पीडक भनिएका कटुवालमाथि छानबिन गरी कारवाही गर्नका स्थानीयकाे माग छ ।
अचम्मलाग्दो त कहाँनिर छ भने दोषी भनिएका मकरबहादुरलाई प्रहरीले पक्राउ गर्न नसके पनि मकरलालका परिवारले बलाम्पाकीको उपचारमा सहयोग गरिरहेका छन् ।बरु दोषी भनिएका मकरबहादुरका बुबा दलबहादुर कटवाललाई प्रहरीले पक्राउ गरेर सोधुपछ गरेर छाडेका छ ।
पीडित र पीडक पक्षबीच व्यवहारिक सम्बन्ध भए पनि वन्यजन्तु मार्न पासो थाप्नु पनि अपराधजन्य कार्य भएकाले कटुवाललाई तत्काल पक्राउ गरी आवश्यक कारवाही गर्न स्थानीयको माग छ । गाेली लागेका बलाम्पाकी हिडडुल गर्न सक्ने अवस्थामा छैनन् । तर, सिकारीलाई बचाउने प्रयास भने भैइरहेको छ । दोषी भनिएका मकरबहादुर कटवाल सागरनाथ वन परियोजनाका अस्थायी कर्मचारी भएकाे खुलेको छ । वनका कर्मचारी नै वन्यजन्तु मार्न लागि पर्नुले कर्मचारीमाथि नै गम्भीर प्रश्न खडा भएको छ ।
