संघीयताले फेरिएको गौरीगञ्ज | ईमाउण्टेन समाचार

Our Network

असोज ११ २०७९, मंगलबार

संघीयताले फेरिएको गौरीगञ्ज

झापा । गौरीगञ्ज गाउँपालिका कुनै बेला विकासको दृष्टिकोणले पछि थियो । सीमावर्ती गौरीगञ्ज वडा नम्बर १ बाहेकका वडा पूर्वप्रधानमन्त्री तथा एमाले अध्यक्ष केपी ओलीको निर्वाचन क्षेत्र हो ।

तर, विकासको दृष्टिकोणले निकै पछि छ । पुरानो गौरीगञ्ज बजारको विकास हुन संघीयता नै चाहियो । संघीयतापछि भने गौरीगञ्ज बजारले आफ्नो मुहार फेरेको छ । बजार क्षेत्रको धुलाम्मे सडक पक्की भएको छ । फराकिला सडक बनेको छ । विगतमा बजार क्षेत्रमा रहेका फुसको घर हटेर पक्की घर बनेका छन् ।

राज्यका लागानीमा बजार निर्माण भएको छ । गौरीगञ्ज बजारबाट नाकासम्म जाने विभिन्न सडक पक्की भएका छन् । ‘विगतको तुलनामा गौरीगञ्ज बजार त पूरै फेरिएको छ । संघीयताको प्रभाव गौरीगञ्जलाई परेको छ,’ स्थानीय अशोकराज थापा भन्छन्, ‘पहिला फुसका घर थिए । ठूला पसल थिएनन् । अहिले परिवर्तन भएर ठूला पसल बनेका छन् । फुसको घर भत्काएर ठूला-ठूला पक्की घर बनेका छन् ।’

लामो समयसम्म बन्न नसकेको हुलाकी राजमार्ग पनि बनेको छ । हुलाकी राजमार्गअन्तर्गत गौरीगञ्ज र खजुरगाछी क्षेत्रमा चार लेनको सकड बनेको छ । जसका कारण गौरीगञ्जको मुहार उज्जयालो भएको स्थानीय राम मण्डल बताउँछन् । ‘पहिला त बर्खामा यो सडक धान रोप्ने खेत जस्तै हुन्थ्यो । अहिले त चार लेनको पक्की भएको छ,’ उनी भन्छन्, ‘विकासको सबैभन्दा ठूलो कुरा सडक सञ्जाल हो । यो नै बनेपछि त धेरै सहज भएको छ नि !’

गौरीगञ्जमा आदिवासी समुदायाको बसोबास धेरै रहेको गौरीगञ्ज गाउँपालिका अध्यक्ष बाबुराजा श्रेष्ठ बताउँछन् । सडक सञ्जालको विकास र बजार क्षेत्रको विकाससँगै अब जनताको जीवनस्तरको विकासमा पनि अघि बढ्ने उनले बताए ।

गौरीगञ्जमा स्थानीय सरकार बनेपछि विकासले फड्को मारेको उनी बताउँछन् । ‘हुलाकी राजमार्गअन्तर्गत सडक निर्माण लगभग सम्पन्न गरेर व्यवस्थित गर्ने तर्फ हामी लागेका छौँ । स्मार्ट सिटीअन्तर्गत सघन सहरीको काम पनि अघि बढेको छ । आउँदा दिनमा पनि पाँच करोडको काम अघि बढ्नेछ,’ अध्यक्ष श्रेष्ठले भने, ‘गौरीगञ्जभित्रका पुराना बाटा सय प्रतिशत नै निर्माण गरेका छौँ । कतिपयमा पक्की गर्‍यो । कतिपय ग्राभेल छन् । आवश्यकताअनुसार पुल, कल्भर्ट पनि निर्माण गरिरहेका छौँ । विद्युत पूर्ण रूपमा जनताले पाएका छन् । हिजोको तुलनमा आज गौरीगञ्जको मुहार फेरिएको छ ।’ 

स्मार्टसिटीअन्तर्गगत आवश्यक पर्ने सडकसहित नयाँ बस्ती निर्माणको काम हुने अध्यक्ष श्रेष्ठले बताए । तर, गाउँपालिका बासीले नबुझ्दा नयाँ बस्ती निर्माणको काम गर्न नसकिएको उनले बताए । अहिले गौरीगञ्ज-३ र ६ मा सडक निर्माण भएको बताए । यसले सहरको सौन्दर्य बढाएको उनले बताए । स्मार्टसिटी अन्तर्गत आएको बजेटले खजुरगाछीमा कृषि बजार विस्तार गरिएको उनले बताए ।  कृषि क्षेत्र रहेको गौरीगञ्जका कृषकलाई कृषिमा अनुदान दिइरहेको उनले बताए ।

Leave a Reply