भैरहवा । आगामी ३० वैशाखमा हुने भनिएको स्थानीय तहको निर्वाचनको लागि रुपन्देहीमा ७०४ वटा मतदान केन्द्र निर्धारण भएको छ । मतदाताले आफूले चाहेका उम्मेदवारलाई सहजरुपमा मतदान गर्न जिल्ला निर्वाचन कार्यालयले २०८ मतदान स्थल तोकेको हो । ती मतदान स्थलमा गत चुनावभन्दा ९४ वटा मतदान केन्द्र थपिन लागिएको छ ।
२०७४ सालमा भएको चुनावमा जिल्लामा पाँच लाख ३७ हजार १२१ मतदाता रहेका थिए । यस आर्थिक वर्षदेखि २४ माघसम्म मात्र कार्यालयले ९९ हजार १४४ जनाले फोटोसहितको मतदाता नामावली संकलनको गरेको थियो ।
कार्यालयले मतदाता नामावली विशेष कार्यक्रमअन्तर्गत दुई चरणमा जिल्लाका १४ वटा पालिकाबाट ४० हजार १३८ जनाको फोटोसहितको मतदाता नामावली संकलन गरेको छ भने निर्वाचन कार्यालय, जिल्ला प्रशासन र इलाका प्रशासन कार्यालयबाट ५९ हजार ६ जनाको नाम दर्ता भएको कार्यालयका कम्प्युटर अपरेटर (शाखा प्रमुख) विनोद भट्टराईले जानकारी दिए ।
हाल ६ लाख ३४ हजार ७९७ जना मतदाता छन । २०७४ मा भएको चुनावमा पाँच लाख ३७ हजार १२१ मतदाता रहेकामा अगामी चुनावका लागि ९७ हजार ६७६ मतदाता थपिएको निर्वाचन कार्यालय रुपन्देहीका प्रमुख अयोध्या भण्डारीले बताए ।
अगामी निर्वाचनका लागि २९ वैशाख २०७९ सम्म १८ वर्ष उमेर पूरा भएका नागरिकले मात्र मतदानमा भाग लिन पाउने छन् । मतदाता नामावली दर्ता नागरिकताको आधारमा भए पनि मताधिकारका लागि १८ वर्ष पूरा भएको हुनु पर्छ ।
यसअघिको प्रदेश एवम प्रतिनिधिसभा निर्वाचनमा जिल्लामा २०८ मतदान स्थलमा ६१० वटा मतदान केन्द्र रहेको थियो । मतदाताको संख्या बढेकोले मतदान केन्द्र थपिएको छ ।
निर्वाचनका लागि मुख्य निर्वाचन अधिकृतसहित १६ वटै पालिकामा निर्वाचन अधिकृत तोकिने प्रक्रियामा छ । सार्वजनिक भएको मतदाताको दाबी विरोध, विवरण सच्याउन र नामावली हटाउन २०–२६ फागुनसम्म जिल्लाका सबै स्थानीय तहमा पठाएका छौँ, बिहीबार यो समयावधि पनि सकिएकाले हामीले तथ्यांक आयोग पठाउँछौ, आयोगले अन्तिम नामावली पठाउँछ निर्वाचन कार्यालय प्रमुख भण्डारीले भने ।
दाबी विरोधपछिको मतदाता संख्या नै अन्तिम हुनेछ । एउटा मतदान केन्द्रमा करिब पाँच हजार मतदाता संख्या कायम गरिन्छ । सोहीअनुसार मतदान केन्द्रको टुंगो लगाउने कार्य हुने गरेको छ । निर्वाचनलाई लक्षित गरी यसपटक इलेक्ट्रोनिक माध्यमको प्रयोग गरी प्रचारप्रसार गरिने, त्यस्तै इन्टरनेटमा आधारित विद्युतीय माध्यमबाट निर्वाचनबारेमा जनचेनतामूलक र शिक्षामूलक सामग्री प्रसारण र प्रकाशन र सामाजिक सञ्जाललाई बढी जोड दिइनेछ । त्यस्तै मोबाइल, रेडियो, टिभीमार्फत पनि प्रचारप्रसार गरिने कार्यालयले जानकारी दिएको छ ।
रुपन्देही जिल्लामा सबैभन्दा बढी मतदाता बुटवल उपमहानगर पालिकाको वडा नम्बर ११ मा १६ हजार २४८ जना छन् । लुम्बिनी वाणिज्य क्याम्पस मतदान स्थल रहेको उक्त वडामा १६ वटा मतदान केन्द्र तोकिएको जिल्ला निर्वाचन अधिकारी भण्डारीले जनाए ।
यस्तै जिल्लामा सबैभन्दा कम मतदाता सिद्धार्थनगर नगरपालिका वडा नम्बर ५ मा ९१३ जना छन् । भैरहवा उच्च मावि मतदान स्थल रहेको सो वडाको लागि एकवटा मतदान केन्द्र तोकिएको छ ।
