विराटनगर। विराटनगर महानगरपालिकामा आकाशे पुल बनाउने योजना अलपत्र, ठेक्का सम्झौता भएपनि पुल निर्माणले पुर्णता पाउन सकेन ।
विराटनगर महानगरपालिकामा आकाशे पुल बनाउने योजना अलपत्र परेको छ । सम्बन्धित निकायको समन्वयकारी भुमिकाको अभाव तथा स्थान सुनिश्चित नगरि योजना कार्यान्वय गर्न खोज्दा झण्डै साढे २ करोड रुपैयाँको योजना अलपत्र परेको हो ।
विराटनगर महानगरपालिकाको कोशी राजमार्गका विभिन्न तीन स्थानमा आकाशे पुल बनाउने योजना चर्चामा आएको पनि झण्डै तीन बर्ष पुगेको छ । २०७७ साल चैत्र २ गते विराटनगर महानगरपालिकाका प्रमुख भिम पराजुलीले नगरक्षेत्रको बरगाछीमा एक कार्यक्रमकाबीच आकाशे पुलको विधिवत् शिलान्यास गर्नुभएको थियो ।
त्यसयता आकाशे पुलको डिजाईन गरि ठेक्का समेत लगाइएपनि हालसम्म पुल निर्माणले पुर्णता पाउन सकेको छैन । सम्बन्धित निकायको ढिलासुस्तीका कारण निर्माण अलपत्र परेको विराटनगर पब्लिक फोरमका अध्यक्ष उत्तम ढुंगेलले बताए ।
महानगरपालिकाले आकाशे पुल निर्माणका लागि भन्दै २०७६ साल फागुन १६ गते टेण्डर निकालेको थियो । त्यसको झण्डै एक बर्षपछि अर्थात् २०७७ माघ २८ गतेमात्र महानगरले ढिलागरि ठेकेदारहरुको टेण्डर स्वीकृत गरेको थियो ।
महानगरको घाँसचोक, बरगाछि र कंचनबाडीचोकमा गरि तीनवटा फलामे संरचनाको आकाशे पुल बनाउनेगरि योजना अघि बढाइएको छ । त्यसमध्ये बरगाछी समेतको दुई स्थानमा निर्माणको ठेक्का विराटनगरको कला बिल्डर्सले पाएको छ भने कंचनबाडीचोकमा आरके बिल्र्डसले ठेक्का पाएको छ ।
महानगरले तीनवटै पुलकालागि २ करोड ४७ लाख रुपैयाँमा ठेक्का लगाएको हो । सम्बन्धित जग्गा धनीहरुले निर्माण रोक्न महानगरमा निवेदन दिएपछि खबरोध भएको कला बिल्र्डसका प्रोपाइटर सञ्जय यादवको तर्क छ ।
विराटनगर महानगरपालिकाले भने विकाससँग जोडिएको बिषयमा सबैले सहयोग गर्नुपर्ने बताएको छ । महानगरपालिकाले आकाशे पुलको योजनाका सम्बन्धमा सरोकारवालासँग पर्याप्त छलफल नगरिएको र स्थानियलाई विश्वासमा लिन नसकिएका कारण काममा ढिलाई भइरहेको हो ।
