एजेन्सी, १९ चैत । विश्व विजेता फ्रान्सले विश्वकप २०२२ को छनौट खेलमा जित निकालेको छ ।
बुधबार राति आवे मैदानमा भएको खेलमा एन्टोनी ग्रिजम्यानको गोलसँगै युरोपेली क्षेत्रको छनौट अन्तर्गत समूह डी मा रहेको फ्रान्सले बोजनिया–हर्जगोविनालाई १–० गोल अन्तरले पराजित गरेको हो ।
फ्रान्सको जितमा ६० औँ मिनेटमा ग्रिजम्यानले गरेको गोल नै निर्णायक बन्यो । जितपछि शीर्ष स्थानको फ्रान्सको तीन खेलबाट सात अंक भएको छ । सोही समूहको अर्को खेलमा युक्रेन र काजखस्तानले १–१ को बराबरी खेलेका छन् ।
यसैबिच समूह सी अन्तर्गत बुधबार राति भएको खेलमा इटाली विजयी भएको छ । लगातार तेस्रो जित निकाल्ने क्रममा इटालीले लिथुवानियालाई २–० ले पराजित गरेको हो । सोही समूहको अर्को खेलमा बुल्गेरिया र उत्तरी आयरल्याण्डले गोलरहित बराबरी खेलेका छन् ।
इटाली ९ अंकसहित समूहको शीर्ष स्थानमा छ । यसैगरि समूह आई अन्तर्गत शीर्ष स्थानको डेनमार्कले लगातार तेस्रो जित दर्ता गरेको छ ।
डेनमार्कले अस्ट्रियालाई ४–० ले पराजित गरेको हो । यस्तै सोही समूहको अर्को खेलमा इजरायलले माल्डोभालाई ४–१ तथा स्कटल्याण्डले फारोइ आइल्याण्डलाई ४–० ले पराजित गरेको छ ।
