काठमाडौं, ३ चैत । नेकपा माओवादी केन्द्रका नेता वर्षमान पुनले चैत्र ५ गतेपछि सत्ता समीकरणले मूर्त रुप पाउने बताएका छन्।
मंगलबार नेकपा माओवादी केन्द्रको संसदीय दलको बैठक पछि सञ्चारकर्मीसँग कुरा गर्दै नेता पुनले चैत्र ५ गते बस्ने जनता समाजवादी पार्टी जसपाको बैठकपछि नेपाली कांग्रेस, नेकपा माओवादी केन्द्र र जसपाबीचको सत्ता समीकरणले मूर्त रुप पाउने बताएका हुन् ।
तीन दलबीच गठबन्धन हुने दावी गर्दै उनले प्रधानमन्त्री ओलीको असंवैधानिक कदमका विरुद्ध संयुक्त आन्दोलन गरिएका कारण तीन दलीय गठबन्धन प्राकृतिक हुने पनि उल्लेख गरे ।
नेता पुनले प्रधानमन्त्रीले प्रतिनिधि सभा विघटन गरेका कारण विश्वासको मत लिने र कार्यकारी प्रमुख हुने नैतिक आधार गुमिसकेको पनि बताए ।
