एजेन्सी, २ फागुन । स्पेनिस ला लिगामा बार्सिलोनाले फराकिलो जित निकालेको छ । घरेलु मैदान क्याम्पनोउमा भएको खेलमा बार्सिलोनाले डेपोर्टिभो अलाभेसलाई ५–१ को फराकिलो अन्तरले हराएको हो ।
यो जितपछि बार्सिलोना फेरि दोस्रो स्थानमा उक्लिएको छ । बार्सिलोनालाई जिताउन कप्तान लियोनल मेस्सीले दुई गोल गरे । मेसीले खेलको पहिलो हाफको अतिरिक्त समय र ७५औं मिनेटमा गोल गरेका हुन् ।
यस्तै ट्रिनकाओले २९औं र ७४औं तथा जुनियर फिर्पोले ८०औं मिनेटमा गोल गरे । अलोभेसका लुइसले एक गोल फर्काए ।
जितपछि २२ खेलबाट ४६ अंक जोड्दै बार्सिलोना दोस्रो स्थानमा उक्लिएको छ । एक खेल कम खेलेको एट्लेटिको ५४ अंकका साथ शीर्ष स्थानमा कायम छ ।
