दाङ, २६ कार्तिक । दाङमा रोकि राखेको बसमा मोटरसाइकल ठोक्किँदा १ जनाको मृत्यु भएको छ, भने १ जना घाईते भएका छन् । मृत्यु हुनेमा बबई गाउँपालिका ६ कटकुइयाँ निवासी ४७ बर्षीय चित्र बहादुर डाँगी रहेको वडा नं. ६ का वडाध्यक्ष राम बहादुर डाँगीले जानकारी दिनुभयो ।
आज बुधवार विहान करिब १० बजेतिर दुर्घटना भएको उहाँले बताउनुभयो । कटकुइयाँ देखी पंचकुलतर्फ आउँदै गरेको रा ३ प ४८६ नम्बरको मोटरसाइकल बबई ७ मठेउरीदेखि तुलसीपुर तर्फ जाँदै गरेको ना ४ ख ६३१० नम्बरकोे यात्रु राख्नका लागि कटकुइयाँमा रोकी राखेको बसको पछाडिबाट ठोकिदाँ दुर्घटनामा भएको इलाका प्रहरी कार्यालय खिलतपुरका प्रमुख मोहन विक्रम केसीले जानकारी दिनुभयो ।
दुर्घटना परी गम्भिर घाईते भएका डाँगीलाई उपचारका लागि राप्ती प्रादेशिक अस्पताल तुलसीपुर लैजादै गर्दा बाटैमा मृत्यु भएको थियो । साथै दुर्घटना परी सोही ठाउँका मोटरसाइकलमा पछाडि सवार ४३ बर्षीय मान वहादुर केसी घाईते भएको प्रहरीले जनाएको छ ।
केसीलाई राप्ती प्रादेशिक अस्पतालमा सामान्य उपचारपछि थप उपचारका लागि बाँके रिफर गरिएको प्रहरीले जनाएको छ ।
