काठमाडाैं, ११ भदाै। संसदको महिला तथा सामाजिक समितिले विदेशमा अप्ठेरोमा परेका नेपालीलाई स्वदेश फर्काउन देश अनुसार फरक फरक उद्धार नीति बनाउन सरकारलाई निर्देशन दिएको छ ।
विभिन्न देशका राजदूत, गैरआवासीय नेपाली संघ एनआएनएका प्रतिनिधि र विभिन्न मन्त्रालयका प्रतिनिधिसँग प्रविधिको माध्यमबाट छलफल गर्दै समितिले सरकारलाई उक्त निर्देशन दिएको हो ।
देशको समस्या, सम्बन्धित देशमा कोरोना भाइरसको अवस्था र उद्दार गर्नुपर्नेलाई प्राथमिकतामा नराखी विदेशमा रहेका नेपाली उद्धारमा एउटै नीति लिँदा समस्या हुने महिला तथा सामाजिक समितिको निष्कर्ष छ ।
सरकारले खोलेको नियमित उडान र स्वदेश फिर्ता गराउनुपर्ने नेपालीबीच तालमेल नमिलेको भन्दै समितिले वैदेशिक रोजगारीमा देखिएका समस्या दीर्घकालीन समस्या समाधानका लागि तत्काल संयन्त्र बनाउन पनि निर्देशन दिएको छ । साथै समितिले वैदेशिक रोजगारीमा रहेका नेपाली महिलाको संख्या यकीन गर्न पनि सरकारलाई निर्देशन दिएको छ ।