एजेन्सी, २० असार । इंग्लिस प्रिमियर लिग फुटबल अन्तर्गत आज पाँचबटा खेल हुँदैछ । प्रिमियर लिगमा शनिबार चेल्सी, म्यानचेस्टर युनाइटेड, आर्सनल, लेष्टर सिटी लगायतका क्लबले प्रतिस्पर्धा गर्ने छन् ।
लिगमा शिर्ष ३ स्थानमा रहनका लागि प्रतिस्पर्धा गरिरहेको चेल्सीले घरेलु मैदानमा वाट्फोर्डसँग खेल्नेछ । स्टामफोर्ड ब्रिजमा चेल्सी र वाट्फोर्डबीचको खेल राति पौने १ बजे सुरु हुनेछ । चेल्सी घरेलु मैदानमा जित निकाल्दै शिर्ष ३ स्थान रहने यात्रालाई थप बलियो बनाउने दाउमा छ । चौंथो स्थानको चेल्सी तेस्रो स्थानको लेष्टर सिटी भन्दा एक अंकले पछि रहेको छ । चेल्सीले ३२ खेलमा ५४ अंक जोडेको छ । लेष्टरको ५५ अंक रहेको छ ।
लेष्टरले घरेलु मैदानमा क्रिस्टल प्यालेससँग तथा म्यानचेस्टर युनाइटेडले घरेलु मैदानमा बर्न माउथसँग खेल्नेछ । घरेलु मैदानमा जित निकाल्दै युनाइटेड शीर्ष चारमा रहेको टोलीविरुद्ध अंक दुरी कम गर्ने दाउमा छ । पाँचौं स्थानमा रहेको युनाइटेडको ५२ अंक छ । बर्नेमाउथ २७ अंक जोडेर रेलिगेसन क्षेत्रमा रहेको छ ।
यसैगरी आर्सनलले उल्भ्ससँग उसैको मैदानमा खेल्नेछ । आर्सनल ४६ अंक जोडेर आठौं स्थानमा रहेको छ । अर्को खेलमा नर्विच सिटीले ब्राइटनसँग खेल्नेछ ।
