काठमाडौं, ८ जेठ । नेपाल कम्युनिस्ट पार्टीका अध्यक्ष पुष्पकमल दाहाल ‘प्रचण्ड’ले संविधान संशोधनको विषयमा मधेसवादी दलहरूसँग सहमति भइसकेको बताउनुभएको छ। उहाँले सरकारमा सहभागी हुने कुरामा टेक्निकल्ली कुरा मिल्यो भने संविधान संशोधन गर्ने विषयमा हस्ताक्षर हुने बताउनुभएको हो।
सरकारले प्रस्तुत गरेको नीति तथा कार्यक्रममा संविधान संशोधनको विषय छुटेको भन्दै राजपाले आपत्ति जनाएपछि अध्यक्ष प्रचण्डले संविधान संशोधनको कुरामा यस बीचमा मधेसमा सरकार बनाउने पार्टीहरूसँग कुरा भइरहेको बताउनुभयो। ‘प्रधानमन्त्री ओली, म र मधेसवादी पार्टीहरूको बीचमा कुरा हुँदा संविधान संशोधनको विषयमा राजनीतिक सहमति पनि भइसकेको छ।’
उहाँले निर्वाचनमा आफूहरूले गरेको घोषणपत्रकै आधारमा नीति तथा कार्यक्रम आएको बताउँदै जनताको अगाडि गरेको प्रतिबद्धताअनुसार काम गर्ने गरी कार्यक्रम आएको प्रतिक्रिया दिनुभयो। ‘नीति तथा कार्यक्रमले विकास, समृद्धि र सुशासनको यात्र तय गर्ने संकल्प गरेको छ’ अध्यक्ष प्रचण्डले भन्नुभयो– ‘आउने बजेटले जनताको चाहना र भावना समेटेर आउँछ।’, यो खबर आजको नेपाल समाचारपत्रमा छ ।
