काठमाडौं, ४ चैत । राष्ट्रियसभाको उपाध्यक्षमा बाम गठबन्धनकी उम्मेदवार शशिकला दाहाल निर्वाचित भएकी छन् । संघीय संसद भवन नयाँवानेश्वरमा आइतबार भएको निर्वाचनमा दाहाल ४५ मतका साथ निर्वाचित भएकी हुन् ।
राष्ट्रिय सभाको कुल ५९ सदस्यमध्ये ५६ जना मतदान प्रक्रियामा सहभागि भएकोमा दाहालको पक्षमा ४५ मत र नेपाली कांग्रेसकी उम्मेदवार विन्दादेवी आले रानाको पक्षमा ११ मत मात्र परेको थियो । यसअघि दाहालको प्रस्तावक माओवादी केन्द्रका दिनानाथ शर्मा, समर्थक दिलकुमारी रावल थापा लगायतले लोकतन्त्रको शुन्दर पक्ष निर्वाचन भएकाले निर्वाचनमार्फत नेतृत्व चयन गर्नुपर्ने बताएका थिए ।
आलेका प्रस्तावक बद्रीप्रसाद पाण्डे र समर्थक सरीता प्रसाईले सहमति र सहकार्यको आधारमा नेतृत्व चयन गर्ने संस्कार विर्सन नहुने धारणा राखेका थिए । दाहाल नेकपा माओवादी केन्द्रको तर्फबाट २ नम्बर प्रदेशको प्रतिनिधित्व गर्दै राष्ट्रियसभामा निर्वाचित भएकी थिइन् ।
