एजेन्सी । बंगलादेशको अन्तरिम सरकारले पूर्वप्रधानमन्त्री खालिदा जियाको निधनको शोकमा बुधवारदेखि शुक्रवारसम्म तीन दिने राजकीय शोकको घोषणा गरेको छ ।
बंगलादेश नेसनालिस्ट पार्टी (बीएनपी) की अध्यक्ष समेत रहनुभएकी ८० वर्षीया जियाको मंगलवार बिहान ढाकामा उपचारका क्रममा निधन भएको हो । उहाँ लामो समयदेखि मुटु र फोक्सो सम्बन्धी विभिन्न स्वास्थ्य समस्याबाट पीडित हुनुहुन्थ्यो ।
सन् १९९१ मा देशको पहिलो महिला प्रधानमन्त्री बन्नुभएकी जिया सन् २००१ मा पुनः प्रधानमन्त्री निर्वाचित हुनुभएको थियो । भ्रष्टाचारको अभियोगमा सन् २०१८ मा कारागार चलान गरिनुभएकी उहाँलाई सन् २०२४ अगस्टमा राष्ट्रपतिको कार्यालयले रिहा गरेको थियो ।
