सरोकारवालाहरुले विश्वमा नागरिक समुदायको खुलापन खुम्चिँदै गएको भन्दै चिन्ता व्यक्त गरेका छन् ।
विश्व सामाजिक मञ्चमा नेपाल गैरसरकारी संस्था महासंघले गरेको अन्तरक्रियामा सरोकारवालाहरुले यस्तो चिन्ता व्यक्त गरेका हुन् । विश्वभरका सरकारले नागरिक समुदायको भुमिकालाई कम महत्व दिएको र खुलापन खुम्च्याउँदै लगेको बताएका छन् ।
नेपालस्थित अन्तर्राष्ट्रिय गैरसरकारी संस्थाहरुको छाता संस्था एआइएनका अध्यक्ष भगवान श्रेष्ठले दक्षिण एशियाको तुलनामा नेपालमा नागरिक समुदाय र खुलापन राम्रो मानिए पनि बिस्तारै खुम्चिँदै गएको बताउनु भयो । विद्यमान नीति तथा अभ्यासको कारणले नागरिक समुदायले धेरै खुलापनको महशुस गर्न नपाएको बताउनु भयो ।
कार्यक्रममा राष्ट्रिय मानव अधिकार आयोगका सदस्य लिली थापाले नेपालमा गैरसरकारी संस्था र नागरिक समाजको भुमिकालाई नजरअन्दाज गर्न नसकिने बताउनु भयो ।
नेपालको सामाजिक रुपान्तरणमा महत्वपूर्ण भुमिका नागरिक समुदायको रहेको बताउनु भयो । नागरिक समाज र खुलापनबारे अझ धेरै छलफल र बहस हुन आवश्यक रहेको बताउनु भयो । यसको महत्व सबैलाई बुझाउन जरुरी रहेको बताउनु भयो ।
कार्यक्रममा युरोपेली युनियनको नेपालका लागि राजदुत भेरोनिक लोरेन्जोले नागरिक समाजको खुलापनलाई देशको आन्तरिक र विश्व राजनीतिले नकारात्मक असर गरिरहेको बताउनु भयो
राजदुत लोरेन्जोले सक्रिय र क्रियाशिल नागरिक समाजले मात्र प्राप्त लोकतन्त्र र समावेशितालाई बचाउन सक्ने बताउनु भयो ।
सम्मेलनमा ९२ मुलुकका करिव ४० हजार मानिसहरुको सहभागिता रहेको छ । सम्मेलनमा एक हजार दुई सय ५२ संस्थाका तर्फबाट १३ मुलविधामा आधारित भएर चार सय कार्यक्रम हुनेछन् । सम्मेलनमा आर्थिक असमानता र आर्थिक न्याय, श्रम, आप्रवासन, दासत्व, मानव बेचबिखन, जात, काम र वंशमा आधारित भेदभाव, जाति, जातीयता, आदिवासी, छुवाछुत र हिंसा, खाद्य सम्प्रभुता, शान्ति, द्वन्द्व, सञ्चार, कानून, स्वास्थ्य, शिक्षा आदि विषयमा नागरिक आन्दोलनको भुमिकाबारे छलफल पनि भएको छ
